Felly pan ffoniais y cwmni yn ôl gyda'r newyddion drwg, meddyliais, pam ddim cynnig fy hun? Mae Dad wedi bod yn poeni ers blynyddoedd pryd y bydd yn Daid.

Yn fuan wedi i mi lenwi holiadur byr, cefais glywed fy mod wedi cael fy newis ar gyfer y sioe, a chefais dipyn o sioc pan glywais mai fi oedd yn cael dewis partner (roedd yn amlwg eu bod yn brin o Wŷr Bonheddig!)

Cafodd y rhaglen ei ffilmio yng ngwesty Morgans yn Abertawe, lle cefais bryd o fwyd gwahanol iawn. Tri chwrs, chwarter awr yr un, a phob cwrs gyda merch gwahanol (tipyn mwy blasus na speed dating!) Roedd rhaid ceisio anwybyddu'r pedwar camera oedd yn fy ngwynebu, a'r ffaith fod yna Seicolegydd drws nesaf oedd yn arbenigo mewn, ac yn dadansoddi iaith y corff. Duw â ŵyr beth oedd fy nghorff i'n ei gyfathrebu!

Chwarae teg iddynt, cefais ddau beint o gwrw cyn dechrau ffilmio, er mwyn helpu fi ymlacio, ac roedd digonedd o win ar gael gyda'r pryd, ac roedd hwnnw'n llifo'n gynt nag oedd yn iach.

Mae'n ddigon anodd cynnal sgwrs â dieithryn o flaen y camerâu, heb sôn am drio bwyta pryd yn daclus a heb wneud smonach o fy nghrys. Dywedodd un o'r criw wrthyf fod yna gamera o dan y bwrdd rhag ofn i fy nhraed gamymddwyn!

Y cwbl ddyweda i yw fod y dair ferch yn wahanol iawn, a'r sgwrs yn llifo'n haws gyda rhai na'r lleill. Gresyn na wnes i lyncu llyfr 'Canllawiau Rhamant' cyn y ffilmio!

Ar ôl dewis un o'r merched, cefais glywed gan y gyflwynwraig Ffion Dafis ein bod wedi ennill trip i Ferlin. Dwi ddim am sôn am y trip hwnnw, bydd rhaid i chi wylio'r rhaglen, ond does dim perygl y bydd Mam yn buddsoddi mewn het o unrhyw fath! Ga'i gymryd y cyfle hwn i ymddiheuro'n ddiffuant am safon fy jôcs a lefel fy hiwmor!

Mwynhewch y sioe!

Aled Cottle