Mae'r tŷ a'r adeiladau yma yn gradd II* felly mae hi'n gyfrifoldeb ac yn dipyn o her edrych ar ôl y cyfan ond mae'n dod yn ei flaen yn araf deg.

Mae hi'n amser prysur o'r flwyddyn rŵan, mae'r siop wedi ail-agor ers y Pasg felly dwi'n treulio dipyn o amser yn gwneud cacennau a chawl cartref. Hefyd mae angen cael trefn ar yr ardd i dyfu'r holl lysiau a ffrwythau ar gyfer y chytnis ar jams cartref.

Mae'r ieir ifanc wedi dechrau dodwy yn ddiweddar a'r ceiliog wedi dysgu sut i ddefnyddio ei lais, yn enwedig yn gynnar yn y bore! Mae'r moch bach (roedd eu llun yn y papur fis Rhagfyr diwethaf) wedi tyfu dipyn ond maent yr un mor ddel. Roeddent mewn sgubor dros y gaeaf yn mwynhau moethusrwydd y lamp gwres pwrpasol ond maent allan erbyn hyn yn mwynhau tyllu yn y cae.

Mae moch wedi cael llawer o sylw yn y newyddion yn ddiweddar oherwydd bod cost eu bwydo wedi codi'n aruthrol ac mae llawer o ffermwyr wedi rhoi'r gorau i gadw moch. Da ni newydd hau ŷd yn un o'r caeau i helpu eu bwydo yn y dyfodol.

Ar ôl yr holl waith o adnewyddu'r hen sgubor mae'n braf ei weld yn cael defnydd erbyn hyn i gynnal partïon pen-blwydd, priodasau, nosweithiau codi pres i elusennau a twmpathau dawns (cawsom dipyn o hwyl yn yr un diwethaf!)

Tan y tro nesa.

Catrin Evans

Rysait Cawl Cenin a Broccoli
Mae llwyth o frocoli porffor (purple sprouting broccoli) yn tyfu yn yr ardd ar hyn o bryd a da ni wedi bod yn ei fwyta bron bob dydd ers rhyw dau fis! 'Dwi wedi dod o hyd i'r rysáit isod ar gyfer cawl cennin a broccoli ac mae o'n andros o flasus. Does dim byd gwell na bowlen mawr o gawl cartref a darn o fasa ffres i lenwi cornel.

Cynhwysion:

i 4 person

50g (20z) o fenyn
2 taten (wedi'u torri mewn ciwbs bach)
3 cenhinen (wedi'u torri'n fan)
845ml (Peint a hanner) o stoc llysiau 200g (70z) o frocoli
200ml (7 fl.oz) o laeth
Halen a pupur

Toddwch hanner y menyn mewn sosban, ychwanegwch y tatws a 2 cenhinen. Rhowch glawr ar y sosban a'i goginio am 10 munud nes eu bod yn feddal.

Ychwanegwch y stoc, fel mae popeth ar fin berwi rhowch ar dymheredd is am 15 munud.

Ychwanegwch y brocoli a'i goginio am 8-10 munud nes ei fod yn dyner. Defnyddiwch 'blender' i gymysgu'r cyfan.

Rhowch y llaeth i fewn ynghyd a halen a pupur a'i gynhesu eto. Toddwch y menyn sydd ar ôl, ychwanegwch gweddill y cennin a'u ffrio nes eu bod wedi carameleiddio. Wrth weini, rhowch y cennin yma ar y cawl.