Heb y datblygiad allweddol hwn, byddai'r gwaith yn y diwedd wedi gorfod cau. Byddai hyn wedi arwain at golli 218 o swyddi uniongyrchol a 400 o swyddi anuniongyrchol gyda chontractwyr a chyflenwyr.

Bydd y cwmni bellach yn gallu bwrw ymlaen gydag odyn newydd i wneud y gwaith yn un o'r rhai mwyaf effeithiol ac amgylcheddol iach yn y byd. Dylai'r adeiladu gymryd tua dwy flynedd ac ar ei anterth bydd hynny'n creu gwaith i dros 500 o bobl.

Cytundebau lleol

Mae'r cwmni'n amcangyfrif y bydd gwerth £12 miliwn o gytundebau'n cael eu gosod yn lleol ar gyfer llafur, offer a defnyddiau ar y safle adeiladu.

Bydd yr odyn newydd yn disodli'r hen odynau sydd yno gan leihau'r cyfanswm o gemegau sy'n mynd i'r awyr yn sylweddol. Bydd hyn yn gymorth mawr i gyflawni strategaethau Cymru o ran yr amgylchedd a gwastraff.

"Mae hyn yn newyddion ardderchog i'r cwmni, y gymuned, economi gogledd-ddwyrain Cymru a'r amgylchedd", meddai rheolwr cyffredinol Padeswood, Tony Allan.

"Rhaid i ni ddiolch am gefnogaeth wych ein gweithwyr teyrngar a'n partneriaid, yr undebau a mwyafrif llethol y gymuned leol. Rydym yn falch o allu talu'n ôl iddyn nhw gyda buddsoddiad a ddylai ddiogelu'r gwaith am flynyddoedd lawer."

Proses ddwys a hir

Mae'r odyn newydd wedi dod trwy broses ddwys a hir, gydag ymchwiliad cyhoeddus a holi manwl gan y Cynulliad Cenedlaethol. Roedd y cynllun eisoes wedi cael cefnogaeth Cyngor Sir y Fflint ac arbenigwyr iechyd ac amgylchedd.

"Rydym yn falch iawn fod ymchwiliad annibynnol wedi edrych ar y cynllun a gweld ei werth i'r gymuned, i'r amgylchedd ac i economi Cymru," meddai Tony Allan.

"Mae gweithgynhyrchu yng Nghymru wedi dioddef yn ddrwg yn ystod y blynyddoedd diwethaf; byddai colli Castle wedi bod yn drychinebus. Rydym wedi bod yn Padeswood ers mwy na 50 mlynedd, gan gynnig swyddi da tymor hir."

Bydd yr odyn newydd yn rhyddhau 75% yn llai o nwyon andwyol tra'n defnyddio ynni'n fwy effeithiol a gwneud defnydd glân o ddefnyddiau a fyddai fel arall yn gorfod mynd i gladdfeydd gwastraff. Un o brif amcanion Strategaeth Wastraff y Cynulliad Cenedlaethol yw gostwng y nifer o gladdfeydd gwastraff.