| Aelodau ydynt o Aelwyd Haf newydd sbon danlli a sefydlwyd am y tro cyntaf eleni dan gefnogaeth Menter Iaith Sir Fflint. Bu'r grŵp yn brysur yn dawnsio gydol yr haf, tan ddysgu camau a dawnsfeydd newydd, mewn paratoad ar gyfer dathliadau Dydd Owain Glyndŵr, ganol Medi. Dywed Bryn Davies, un o drefnwyr yr Aelwyd Haf, "Mae hwn wedi bod yn gyfle gwych i'r bobl ifanc ymgymryd mewn gweithgareddau traddodiadol Cymreig. A chyda Eisteddfod yr Urdd yn dod i Sir Ddinbych mewn dwy flynedd, mae'r Aelwyd Haf yn gosod craidd cadarn i allu mynd ymlaen i gystadlu ar lefel genedlaethol." Ategodd Rhian Davies, Swyddog Datblygu Menter Iaith Sir y Fflint, "Ein bwriad oedd darganfod faint o ddiddordeb oedd mewn sefydlu Aelwyd, a'r gobaith yw nawr, o weld y gefnogaeth yw sefydlu Aelwyd parhaol cryf ar gyfer Gogledd Ddwyrain Cymru (ardal yr hen Glwyd)." Uchel bwynt yr haf oedd cael perfformio ar y cyd gyda Dawnswyr Delyn yn nathliadau Dydd Owain Glyndŵr y tu allan i dafarn yr Owain Glyndŵr, Gwernymynydd, dydd Sul y 12fed o Fedi. Ni allai Morris y Gwynt nac Ifan y Glaw darfu ar frwdfrydedd y dawnswyr na'r cefnogwyr a cafwyd perfformiad hwyliog a diddanol. Cafodd y diwrnod ei gloi gyda noson o adloniant yng nghwmni Pen Tennyn, a chwaraeodd eu set mewn teyrnged er cof am Geoff Jenkins.
 | 
