Daeth cyfle gwych gerbron disgyblion Ysgol Croes Atti a thrigolion Oakenholt wrth iddynt gydweithio gyda'r artist Cefyn Burgess i greu murlun cymunedol (prosiect diweddaraf Menter Iaith Sir y Fflint). Mae'r murlun yn adlewyrchiad o'r fro ac yn llawn o nodweddion hanesyddol a modern tref Y Fflint. Y canlyniad pwysicaf i Cefyn, yw bod y gwaith gorffenedig yn adlewyrchu cymeriad y fro, a hynny trwy ddychymyg creadigol y plant. Gyda rhai adeiladau yn las, coch a melyn a hyd yn oed fflatiau pinc, gwylanod enafawr ar ben y castell a physgod maint morfilod yn Afon Dyfrdwy, mae'n amlwg pam fod Cefyn yn gredwr cryf yng ngallu plant i fod yn greadigol iawn.

Dywedodd Cefyn ei fod o wedi cael pleser mawr yn dysgu am yr ardal. "I fod yn onest doeddwn i erioed wedi bod yn Y Fflint yn iawn ond ar ôl treulio cymaint o amser yma dwi wedi dod i wybod am yr holl hanes sydd i'r dref diolch yn bennaf i'r plant! Credaf fod o'n un o'r trefi sydd â mwyaf o gymeriad iddi. Roedd gweithio gyda phlant yr ardal yn brofiad ysbrydoledig iawn."

Does dim amheuaeth fod y prosiect wedi bod yn brofiad bendigedig i'r plant a oedd wedi cael ymarfer eu hiaith Cymraeg mew awyrgylch hwyliog ac anffurfiol.

Cydlynwyd y brosiect gan Fenter Iaith Sir y Fflint fel rhan o'i phrosiect Iaith a Threftadaeth gyda chymorth y Cynllun Datblygu Gwledig i Gymru 2007-2013 a gyllidwyd gan Lywodraeth Cynulliad Cymru a'r Undeb Ewropeaidd.