Does fawr o synnwyr amlwg i'r geiriau sy'n cael eu canu i alaw y Cadi Ha, ond dyna oedd rhai cannoedd o blant ac oedolion yn ei wneud yn Nhreffynnon, Maes Glas, Caerwys a'r Wyddgrug ar Sadwrn yr Ŵyl Fai eleni.

Roedd Gwyl y Cadi Ha yn llwyddiant ysgubol unwaith eto. Rhaid bod y tywydd braf yn chwarae ei ran ....bob blwyddyn!

Tyfu'n flynyddol

Mae'r Ŵyl wedi ail-sefydlu'i hun ac yn tyfu'n flynyddol. Mae nifer y plant, yr ysgolion, a'r gwylwyr yn cynyddu'n flynyddol.

Eleni daeth grwpiau dawns oedolion atom i helpu'r dathlu - o Gaerdydd, Caerfyrddin, y Rhondda, Pen y Bont ar Ogwr, Llangadfan, Caernarfon a Chonwy.

Cafwyd dipyn o hwyl ar y stryd gyda'r dawnswyr a'r cymeriadau. Roedd y gerddi yn llawn ac roedd safle'r Abaty yn creu cefnlen dda hefyd ac mae'r sgwâr yng Nghaerwys yn cynnig ei hun yn naturiol i berfformiadau.

Bu'r twmpath yn Neuadd yr Eglwys yn Yr Wyddgrug yn llwyddiant eto...yn dilyn llwyddiant yr Hen Galan. Bydd rhaid archebu tocynnau'n go fuan at yr un nesaf!

Cwmni da, cerddoriaeth dda, plant hwyliog, dawnsio da, tywydd braf ac ychydig o leddfu syched a thwmpath bywiog gyda'r nos a dyna ni Gadi Ha arall i'w hefelychu!

Byddwch yn barod am y nesaf!