Rydym yn trefnu digwyddiad newydd yn Sir Y Fflint, i'w chynnal eleni yn nhref Yr Wyddgrug ar y 15-16 Awst, 2008. Gŵyl traddodiadau celfyddyd cyhoeddus yn bennaf fydd Tegeingl.
Pan ddaeth y Rhufeiniaid i'r rhan yma o'r byd, y Decangli oedd y llwyth Geltaidd brodorol ac felly hwythau yw trigolion cynharaf yr ardal gydag enw gallem cysylltu a hwy. Wedi ymadawiad y Rhufeiniaid datblygwyd cantref mewn ardal yn cyfateb yn fras i ran helaeth o Sir Y Fflint heddiw.
Cymerodd y cantref yr enw Tegeingl ar ôl y Decangli. Ers yr 8fed ganrif, newidiodd Tegeingl ddwylo sawl gwaith rhwng tywysogion Gwynedd, y Mersiaid, y Normaniaid a Choron Lloegr.
Trwy'r Ŵyl byddwn yn adlewyrchu'r gelfyddyd a'r diwylliant gwerin gyfoethog sydd wedi datblygu a goroesi yma yn ardal y Decangli ar hyd y canrifoedd.
Mae lleoliad Tegeingl/Sir y Fflint yma ar y ffin gyda'r llanw a thrai o ddiwylliannau yn golygu bod cymysgedd cyfoethog ac unigryw iawn o hanes, treftadaeth a chelfyddyd yn yr ardal.
Un o brif amcanion yr Ŵyl yw bod yn ddrws agored y gall ymwelwyr o bell ac agos gamu trwyddo i brofi a chymryd rhan yn y gorau o ddiwylliant ac amcan arall yw denu artistiaid o wledydd eraill i ddiddanu ni'r Cymry.
Bydd caneuon, alawon, dawnsfeydd a chwedlau gwerin traddodiadol a chyfoes ein hardal a'n gwlad yn cael sylw a llwyfan ochr yn ochr a'u bath o wledydd eraill.
Bydd y prif lwyfan wedi ei osod mewn marquee ar gaeau Clwb Rygbi'r Wyddgrug. Bydd yno le i gynnal cyngherddau, cystadlaethau a thwmpathau dawns. Bydd ail leoliad yn y Clwb Rygbi ei hun ar gyfer trefnu gweithgareddau celf i blant a theuluoedd a gweithdai dawns, iaith, cerddoriaeth offerynnol a lleisiol. Bydd ardal ieuenctid a chystadleuaeth Cerddor Ifanc. Yn ogystal a hyn bydd stondinau cynhyrchwyr a busnesau lleol, fel bod modd i'n hymwelwyr gael blas o'r hyn sydd i'w gynnig gan Sir y Fflint a'r cyffiniau.
Os oes gennych unrhyw wybodaeth am gelfyddyd gwerin yr ardal hoffem yn fawr iawn clywed gennych. Rydym yn gobeithio cynnig blas o ddiwylliant yr ardal trwy'r meysydd canlynol: canu lleisiol, canu offerynnol, dawns, llenyddiaeth, barddoniaeth ac adrodd chwedlau. Byddem yn ddiolchgar iawn am bob cyfraniad boed o ran gwybodaeth, hanes, diddordeb mewn cynnal stondin neu perfformiad, cefnogaeth pwyllgorol / arianol / stiwardiol, syniadau eraill ayyb.
Os hoffech gyfrannu cysylltwch a Rhian ar 07919 177373 neu [email protected].
Mae Cymru yn wlad gyfoethog o ran diwylliant, hanes, iaith a threftadaeth ac yn aml mae pobl yn anghofio beth sydd gan eu hardal leol i'w gynnig. Rydym yn gobeithio y bydd Tegeingl - Gŵyl y Werin Gudd yn datguddio rhyfeddodau i bawb!
