Mae digonedd wedi digwydd ers hynny. Mae'r genhedlaeth gyntaf o aelodau Clwb y Bobol Bach bellach yn rieni eu hunain, a'u plant yn dilyn ôl traed eu rhieni ac yn aros yn eiddgar am eu cyfarchio penblwydd.

Mae nifer o hen gyfeillion wedi ein gadael, ac rydym wedi croesawu dwsinau o deuluoedd newydd i'n broydd.

Ers y rhifyn cyntaf hwnnw rydym wedi gweld golygyddion, swyddogion, cyfranogwyr, gwirfoddolwyr a gohebwyr llawer rhy niferus i'w cyfri rhwng tudalenau ein papur bro.

Rydym wedi clywed hanes gweithgarwch dwy Eisteddfod Genedlaethol, un Eisteddfod yr Urdd ac un Gwyl Gerdd Dant o fewn ein dalgylch. Gwelsom sefydlu Cynulliad Cenedlaethol Cymru a darllenwyd am hanes y Fenter Iaith yn tyfu o nerth i nerth. Clywyd hanes degau o ieuenctid y fro yn blasu llwyddiant mewn meysydd amrywiol - nifer yn cael eu denu at oleuadau llachar ein prif ddinas, a sawl un yn dychwelyd i fro bendigedig eu mebyd.

Trwy'r papur cafodd y fro gyfan ymuno yn nathliadau priodasau a genedigaethau niferus.

Dros y blynyddoedd mae Papur Fama wedi cofnodi a chroniclo gweithgareddau lu trigolion cysgod Moel Famau, gan adrodd hanesion difyr, anfon cyfarchion a ffarwelio a thalu teyrngedau i hen gyfeillion. Mynegwyd sawl barn, siom a gobaith rhwng gloriau ein papur ni.

Disodlwyd yr hen deipiadur, y papur a'r glud gan dechnoleg modern yr AppleMac a'r ebost, ond yr un yw'r cyfeillgarwch a estynir i holl ddarllenwyr y papur. Mae Papur Fama wedi goroesi ac yn ffynnu yma ar y ffin. Diolchwn i'r criw dewr a ddaeth ynghyd ar y cyntaf o Dachwedd 1978 gyda'r weledigaeth i ddechrau papur bro.

Diolch Papur Fama - a hir oes i'n papur bro!