Plant o Ysgol Tanygrisiau yw y rhai cyntaf yng Nghymru i fanteisio ar gynnig pecyn o 30 o goed am ddim, i'w plannu i greu darn o wrych neu brysglwyn. Mae'r cynnig hwn yn cael ei wneud fel rhan o sialens Coed i Bawb, sef menter gan Goed Cadw , prif elusen gwarchod coetir y DU.

Coed i Bawb yw'r sialens plannu coed i blant mwyaf, a mwyaf cyffrous, a welwyd erioed yn y DU. Y bwriad yw ysbrydoli cenhedlaeth newydd i ailgysylltu a byd natur.

Fe fydd Coed i Bawb yn rhoi cyfle i o leiaf miliwn o blant fynd i'r afael a byd natur a chael hwyl yn plannu coed. Gweledigaeth yr ymgyrch yw y dylai pob plentyn gael y cyfle i blannu coed. Fel rhan o'r ymgyrch, plannir 12 miliwn o goed brodorol dros gyfnod o bum mlynedd - sef un ar gyfer pob plentyn o dan 16 oed.

Yma yng Nghymru, mae Coed Cadw yn bwriadu plannu 600,000 o goed, sef un ar gyfer pob plentyn o dan 16 oed, ac yn fwy uchelgeisiol, rhoddir cyfle i o leiaf 50,000 o blant eu plannu nhw.

Mae Coed Cadw yn ddiolchgar i gwmni Rheilffordd Ffestiniog am ganiatáu i'r plant blannu'r coed yn yr orsaf, a helpu i drefnu'r digwyddiad. Fe fydd Rheilffordd Ffestiniog yn gweithio mewn partneriaeth gyda Choed Cadw ym Meirionnydd dros y pum mlynedd nesaf, fel rhan o Brosiect Rheoli Cynefin Coedydd Derw Meirion, sef prosiect a ariannir gan yr UE, i wella cyflwr coed derw hynafol yr ardal sydd yn rhan mor bwysig o'i hetifeddiaeth naturiol.

Dywed Mrs Hazel Hughes, Prifathrawes Ysgol Tanygrisiau: "Mae hwn yn gyfle gwych i'r plant allu plannu coed yn eu cymuned eu hunain, coed y byddan nhw'n gallu eu gweld yn tyfu dros y blynyddoedd. Gobeithio y bydd llawer o ysgolion eraill yng Nghymru yn gallu manteisio ar y cynnig hwn o goed i'w plannu, fel bod eu plant yn gallu mwynhau'r un profiad."

Cafodd y coed i gyd eu plannu mewn bore, a gwir yw dweud bod y plant wedi mwynhau y profiad yn fawr iawn, er bod y gwaith wedi bod braidd yn fwdlyd!