Cychwynnodd cynllun Y "Bevin Boys" ar yr ail o Ragfyr 1943, gyda'r bwriad o gael un o bob deg oedd yn cofrestru i wasanaeth i fynd i weithio mewn pwll glo, gan fod gymaint o löwyr wedi mynd i'r lluoedd arfog.

Gadawodd Elwyn Ysgol Sir Ffestiniog ar y 4ydd o Chwefror ac aeth ar y trên i Stoke on Trent ar y 7fed o Chwefror. Cafodd fis o hyfforddiant yn Kemblepit, Fenton, gan letya yn Longtobr cyn symud i Brown Edge, pentref ar ochr ogleddol y ddinas i gael cartref oddi cartref gyda glöwr a'i deulu tan iddo adael y lofa ar yr 21ain o Fedi 1947, a dychwelyd yn ôl i'r Blaenau.

Mae'n cofio siarad ar ben y pwll un bore cyn mynd i lawr gyda Twm Felin o Aberllefeni (tad y diweddar Rhydderch Jones, y dramodydd enwog) a ddywedodd fod bachgen o 'Stiniog wedi cyrraedd yr hostel lle roedd Twm yn lletya. Cyril Jones o Danygrisiau oedd y bachgen hwnnw, a oedd yn gweithio ym mhwll Bellerton, tua dwy filltir o Chatterley Whitfield ar y pryd.

Diweddodd Cyril ei oes ym Modafon, a cofir ef fel aelod o Gyngor Tref Ffestiniog ar ddechrau'r wythdegau.

Hyd heddiw mae Elwyn, sydd bellach dros ei wythdeg yn ymfalchïo yn y ffaith iddo weithio ochr yn ochr a chyfoedion mor deyrngar i lawr y pwll.