Ond dim ond un rhan fach o gynllun Lleisiau ydi'r wythnos honno o ddarlledu cenedlaethol. Dim ond un partner yn y fenter ydi BBC Cymru, mae na nifer dda o bobl leol eisoes wedi bod mewn cyfarfodydd i drafod y fenter.

Ond tydi hi ddim yn rhy hwyr! Mae 'na wahoddiad i bawb ohonom ni, yn unigolion, yn gymdeithasau neu fudiadau ymuno yn y gweithgareddau.

Os bydd Jonsi a'i debyg wrth y meicroffon yn ystod wythnos olaf Mehefin, mi fydd na dalentau lleol yn dangos eu doniau wrth yr un meicroffon yn ystod y mis.

Mae'n fwriad i ni gael darlledu'n lleol o'r hen Go-op hefyd. Gobeithir darlledu rhaglen awr a hanner i ardal y Blaenau bob nos rhwng hanner awr wedi chwech ac wyth am wythnos os nad pythefnos. Sêr y rhaglenni hynny fydd pobl leol, pobl ifanc, plant, pobl o bob oed - chi efallai - does dim ishio bod yn swil.

Mi fydd yr hen Go-op ar agor yn ystod y dydd a chyfle i ni gyfrannu i dudalen ar y we am Lleisiau Blaenau, gan gynnwys congl atgofion a hanes lleol, congl i ddweud eich barn, i farddoni i dynnu llun neu i wneud dim ond siarad.

Bydd croeso mawr i bobl ddod a lluniau ac atgofion efo nhw, a gellir gwneud copi o'r lluniau yn y fan a'r lle a'u gosod ar y we, ynghyd a stori tu ôl i'r llun. Neu os mai dyna fydd yn mynd a'ch ffansi, mae na fwriad arall i ddod a chopïau o hen raglenni wnaed am yr ardal, rhaglenni teledu a radio, a chewch eistedd yno yn cofio hwn a hwn neu hon a hon ddaliwyd mewn llun neu raglen radio beth amser yn ôl.

Mae na lu o weithgareddau yn cael eu cynllunio ar gyfer y ddau fis nesaf, offerynwyr o gerddorfa BBC Cymru yn cynnal ambell weithdy, creu wal graffiti, creu murlun ac unrhyw beth arall sydd yn mynd a ffansi pobl y fro.

Mae na rai o bobl y fro eisoes wrthi yn creu straeon digidol i'w dangos ar wefannau'r BBC. Lle i ni gael clywed lleisiau'n gilydd, a ffordd i Gymru benbaladr glywed ein lleisiau ni fydd yr hen Go-op yn ystod y misoedd nesaf.

Un o binaclau'r cynllun fydd gwyl fawr Lleisiau'r Blaenau ar y 14eg o Fehefin ar gae Glanpwll, gobeithio. Mi fydd na lwyfan mawr gydag adloniant amrywiol arno am dair i bedair awr, y bwriad yw clywed bandiau lleol, y bandiau pres, y corau a llu o artistiaid gorau'r fro, i gyd yn perfformio ac yn cael eu darlledu ar BBC Radio Cymru.

Yna fel rhan o'r wyl gobeithio bydd gweithgareddau chwaraeon a gweithgareddau gan fudiadau cenedlaethol, heb son am lu mawr o weithgareddau gan fudiadau lleol.

Os ydach chi yn cynrychioli mudiad neu gymdeithas leol ac eisiau trefnu gweithgaredd ar y cae i godi arian neu er mwyn ennyn diddordeb rhywun, mae croeso cynnes i chi fod yn rhan o Lleisiau. Galwch yn yr hen Go-op, bydd ar agor o fewn ryw wythnos, neu cysylltwch â John Roberts (07752 451496) cynhyrchydd Lleisiau, ar ran BBC Cymru, mae o hyd y dref fwy neu lai bob dydd, a tydi o ddim yn brathu, neu ynglyn â deunydd ar y we, gyda Glyn Evans (01248 374964).