Dros y misoedd diwethaf rhoddodd Glyn bleser a hwyl i ni wylwyr Big Brother ond rhoddodd lawer mwy i Blaenau a'r Gymraeg. Braf gweld bachgen ifanc brwdfrydig yn llwyddo'n rhyfeddol ar raglen Saesneg a hynny yn ei ddull naturiol a hoffus.

O ganlyniad i ymddangosiad Glyn yn y tŷ gydag amryw o gystadleuwyr eraill mae'r fro wedi cael cryn sylw a ieuenctid y fro yn ymhyfrydu yn yr hyn a wnaeth Glyn.

Pwy all anghofio'r gwersi coginio, y dawnswyr Morris, y Brawd Mawr ei hun yn siarad Cymraeg, y carchar a'r cinio dydd Sul wedi ei gymysgu i gyd mewn gwydr!

Ond Glyn fe wnes ti wynebu'r her gyda gwên bob tro a hynny mor naturiol, yn amlwg yn un o hogia Blaenau.

Rhaid llongyfarch Glyn am yr hyn a wnaeth wrth i Brydain ei wylio a rhoi sylw i'n bro ac i'r Gymraeg. Mae'r ffaith ei fod wedi bod yn sgwrsio gydag Imogen yn ei famiaith wedi codi ymwybyddiaeth o'r Gymraeg i gynulleidfa llawer ehangach a dangos pa mor naturiol y gall dwyieithrwydd fod.

Do fe dyfodd y bachgen yn ddyn chwedl y gân, ond i'r miloedd fu'n gaeth i'r sgrîn am dri mis roedd yn bleser gweld wyneb cyfarwydd. Er na wnaeth ddod i'r brig Glyn ydi'r enillydd yn ein llygaid ni.

Llongyfarchiadau mawr i ti a phob dymuniad da i'r dyfodol. Un o hogia Blaenau yn llwyddo eto.

Elisabeth Jones