Mae Cyngor Gwynedd gyda Adran Economi a Thrafnidiaeth y Cynulliad, wedi comisiynu cwmni o ymgynghorwyr i edrych ar y budd posib allai ddeillio o gludo nwyddau a gwella gwasanaethau teithwyr ar hyd Rheilffordd Dyffryn Conwy fel rhan o adfywiad economaidd ehangach Blaenau Ffestiniog a'r ardal o'i gwmpas.

Er bod cynllun wedi ei ddatblygu'n wreiddiol i gludo gwastraff llechi, bydd y gwaith yma hefyd yn edrych ar nwyddau a chwmnïau eraill fydd o bosib yn cludo nwyddau eraill yn ardal Meirionnydd.

Bydd yr ymchwil hefyd yn ystyried unrhyw effaith neu fudd a allai fod i deithwyr ar y rheilffordd.

Dywedodd Cynghorydd Gwilym Euros Roberts o Flaenau Ffestiniog: "Yn naturiol, dwi'n hynod o falch fod Llywodraeth y Cynulliad a Chyngor Gwynedd yn ariannu'r gwaith pwysig hwn a dwi'n mawr obeithio y bydd canlyniad yr astudiaeth yn dangos fod achos busnes gryf ar gyfer uwchraddio'r rheilffordd er mwyn cludo nwyddau a theithwyr ar hyd y rheilffordd bwysig yma er mwyn creu cyfleon economaidd ar gyfer yr hir dymor yn ardal Blaenau Ffestiniog".

Tra bod yna gryn waith ymchwil eisoes wedi ei wneud dros y blynyddoedd a aeth heibio, mae'n ymddangos fod amgylchiadau a rahi ystyriaethau elfennol wedi newid yn ystod y pum mlynedd ddiwethaf.

Er hynny, rhagwelir y bydd modd defnyddio gwybodaeth flaenorol sydd ar gael, a'i ddiweddaru yn ôl yr angen.

Bydd y gwaith o baratoi'r astudiaeth yn cynnwys ymgynghori gyda amryw fusnesau, asiantaethau a grwpiau cymunedol lleol.

Gobeithir y bydd yr adroddiad yn cael ei chwblhau erbyn diwedd mis Mai.