Agorwyd yr arddangosfa yn swyddogol gan y Cynghorydd Dilwyn Roberts ar Mai 28ain.

Dyma gyflwyniad Enlli: Yn enedigol o Langernyw, mynychais Ysgol Bro Cernyw ac Ysgol Dyffryn Conwy.

Yno, tra'n gwneud fy lefel A, cefais y cyfle i wneud cwrs o'r un safon mewn ffotograffiaeth yng Ngholeg Llandrillo.

Cefais y cyfle yno i ddatblygu a phrintio lluniau yn y dull traddodiadol yn yr ystafell dywyll.

Datblygais fy sgiliau a chael 'A' fel gradd derfynol. Y flwyddyn wedyn mynychais gwrs addysg bellach mewn ffotograffiaeth sef HND.

Deilliodd fy niddordeb yn ifanc iawn ar ôl derbyn camera bach 'instamatic' yn anrheg Nadolig gan ffrind teulu ac 'roeddwn wrth fy modd yn tynnu lluniau coed a defaid!

Pan oeddwn yn hyn, 'roeddwn yn cael defnyddio camerau SLR fy rhieni cyn cael camera digidol fy hun.

Yn yr arddangosfa yma, fel rhan o'm cwrs, rwyf yn dangos rhai o'r lluniau yr wyf wedi eu cynhyrchu tra'n gwneud y cwrs HND.

Mae trawsdoriad o'r hyn sydd yn cael ei arddangos rhwng y ffotograffiaeth draddodiadol (du a'r gwyn) a'r ffotograffiaeth fodern (digidol).

Fy ysbrydoliaeth ar gyfer y gwaith digidol oedd lluniau ffasiwn mewn cylchgronau merched.

Fy mwriad oedd defnyddio merched arferol, naturiol yn hytrach na 'sgerbydion i ddangos bod yr un math o ddillad ffasiynol yn edrych yn dda ar ran fwyaf o boblogaeth y wlad, nid yn unig ar y modelau maint sero.

Cefais gyfle hefyd i dynnu lluniau o waith crefft Buddug yn dylunio dillad.

Penderfynais ar brosiect arall yn ymwneud ag erydiad tir ar y glannau, yn benodol Ynys Enlli gan fy mod wedi treulio sawl gwyliau haf yno tra'n blentyn.

Fy mwriad oedd creu lluniau prydferth o'r erydiad a dogfennu'r presennol.'

Carai Enlli ddiolch i'r Cynghorydd Dilwyn Roberts; Ymddiriedolwyr Amgueddfa'r Cwm; Wil Evans, Coetmor, y modelau - Buddug Williams, Tŷ Mawr; Elin Chilton; Lois Williams, Dolwen a phawb arall sydd wedi cynorthwyo gan gynnwys paratoi'r bwyd.

Gyda chynifer o grefftwyr ifanc lleol gobeithio y bydd modd cynnig cyfleoedd eraill yn y Dyfodol. Y Gadlas