Er mwyn rhoi cefnogaeth i daith noddedig Jenny mae Cymru Cuba yn cynnal noson o gerddoriaeth salsa byw yn Neuadd y Dref, Dinbych ar nos Sadwrn y l5ed o Dachwedd pan fydd y chwechawd hynod 'Los Youmas' yn perfformio son Cubanaidd.

Mae gan Jenny gryn brofiad o deithiau beic noddedig gan iddi eisoes drefnu teithiau llwyddiannus yn Ne Affrica a De America. Bydd hyd at ddeg o bobl yn cymryd rhan ar y daith yng Nghuba, pob un yn talu eu costau eu hunain ac yn codi isafswm o £500 yr un o nawdd.

Tros y blynyddoedd diwethaf cododd Cymru Cuba dros £3,000 ar gyfer prosiectau iechyd ac addysg yng Nguba. Y gobaith yw y bydd ymdrechion Jenny yn codi mwy na £5,000.

Dysgwraig y Flwyddyn
Bydd rhai o ddarllenwyr Y Bigwn yn cofio Jenny. Enillodd wobr Dysgwr y Flwyddyn yn 1988.

Mae nosweithiau salsa Cymru Cuba, a gynhelir ddwywaith y flwyddyn yn Ninbych, yn hynod boblogaidd gyda dilynwyr salsa ar draws gogledd Cymru a'r gororau. Chwaraeodd rhai o brif fandiau Cuba yn Ninbych, gan gynnwys y byd enwog Sierra Maestra.

Ar nos Sadwrn y 15ed o Dachwedd bydd y band Cubanaidd "Los Yumas" yn chwarae dan arweiniad y canwr Leo Duany, sy'n hanu'n wreiddiol o Santiago de Cuba. Byddant yn perfformio son Cubanaidd clasurol, sef gwreiddiau salsa, gan ddod â synau a chynnwrf yr ynys yn y Caribi i gynulleidfa yng ngogledd Cymru.

Dysgu dawnsfeydd yr ynys
Cyn y perfformiad bydd rhai o aelodau Salsa Cymru, sydd â'u canolfan yn Yr Wyddgrug, yn dangos a dysgu symudiadau sylfaenol dawnsio merengue. Bydd modd, felly, i'r sawl sy'n newydd i salsa fwynhau dawnsio drwy gydol y noson. Yn y bar fe gynigir dewis o coctêls Cubanaidd, gwin, cwrw, lager a diodydd di alcohol ac ar stondin lyfrau Cymru Cuba gwerthir crysau T a chryno ddisgiau yn ogystal â llenyddiaeth am Guba.