A hithau ond yn 25 mlwydd oed, Rhian yw'r aelod ieuengaf erioed o'r Awdurdod.

Mae Awdurdod Heddlu Gogledd Cymru yn bont rhwng y gymuned leol a'r heddlu. Mae'r Awdurdod yn ymgynghori â'r cyhoedd am blismona yng ngogledd Cymru.

Mae'r Awdurdod yn cynnwys 17 Aelod, 9 ohonynt yn gynghorwyr lleol (wedi eu penodi gan Gydbwyllgor), 3 Ynad Heddwch (a benodwyd gan Bwyllgor Llysoedd Ynadon Gogledd Cymru), a 5 Aelod Annibynnol. Penodir yr aelodau annibynnol trwy broses sy'n cynnwys yr Awdurdod a'r Ysgrifennydd Cartref.

Cafodd Rhian ei phenodi'n aelod annibynnol ar y 15fed o Fawrth 2007 a chychwynodd ar y gwaith ar y 1af a Ebrill 2007. Bydd Rhian yn ymgymryd â'r gwaith law yn llaw a'i swydd fel cyfreithwraig.

Dywedodd Rhian wrth y Bigwn ei bod yn edrych ymlaen yn fawr i gychwyn o ddifri ar y gwaith ac hoffai ddiolch i'r rhai sydd wedi ei chefnogi dros y misoedd dwytha 'ma ac sydd wedi ei hysgogi i fynd am y swydd, gan gynnwys yn benodol Owain, ei theulu, ei chydweithwyr yn Swayne Johnson a'r rhai hynny a ysgrifennodd dystlythyrau i Awdurdod Heddlu Gogledd Cymru ar ei rhan.

Cadeirydd yr awdurdod yw'r Cynghorydd Ian Roberts, Aelod o Awdurdod Lleol Wrecsam. Yr Is-Gadeirydd yw'r Cynghorydd Elwyn Edwards, Aelod o Awdurdod Lleol Sir Ddinbych.