Pe bawn i'n rhyw fath o arbenigwr, mi fydda gen i rhyw fath o syniad hwyrach am be i edrych wrth geisio cloriannu gwerth. Yr hyn ddywedwyd wrtha i gan hen law arni, yw peidio â dangos gormod o ddiddordeb mewn dim oedd yn mynd a 'mryd. "Mae sbec sydyn dan-dinaidd ffwrdd â hi yn ddigon", medda fo.

Ac fe ddyla fo wybod achos mae ganddo fo lond garej o drysorau sy'n dda i ddim ac yn amhosib cael gwared ohonyn nhw. Mae gwrando ar yr hogiau 'ma wrthi hi'n trin a thrafod gwerth neu ddiffyg gwerth rhywbeth yn addysg.

Ac os sylwch chi, mae nhw bob amser yn siarad drwy ochr 'i cegau. Beth ydi pwrpas neu arwyddocâd hynny, Duw â ŵyr ond mae hi'n rhan annatod o'r ddefod. Ffordd gyfrin o drosglwyddo gwybodaeth siwr gen i ond mae'n golygu blynyddoedd o ymarfer, nid peth hawdd ydi cynnal 'sgwrs gall drwy ochr eich wyneb.

Chewch chi neb byth wedi cael ei wneud, na chwaith heb gael bargen a hanner hefo rhywbeth neu'i gilydd ac mae sodro bargen yn hanfodol i lwyddiant y diwrnod. 'Does fyw ei throi hi tua thre heb gael bargen. Felly i osgoi'r cyflwr hwnnw o fethiant llwyr mae'n rhaid argyhoeddi eich hun eich bod yn fwy o lwynog na'r arwerthwr. Tipyn o gamp - welsoch chi'r un o rheini yn curo ar ddrws unrhyw wyrcws yn naddo!

Cyfrinach arall yn ôl y gwybodusion ydi edrych yn wybodus a rhoi'r argraff eich bod chi'n deall y dalltings. Mae 'na lai o siawns y cewch chi'ch blingo wedyn. Mae 'na ffyrdd o ofyn heb swnio'n dwp a gollwng y gath o'r cwd. Mae 'na eiriau a jargon y dylid eu dysgu ar gof i'w defnyddio pan mae angen creu mwy o argraff ac fel y crybwyllwyd eisoes mae hi'n hanfodol medden nhw, ymarfer y dechneg o fwrw golwg heb dynnu sylw.

Mae bod ar drywydd bargen fel mynd i'r gad - mae hi'n rhyfel, y chi a nhw - neb arall, ac mae'r arwerthwr bob amser ar eu hochr nhw'. Dyna un ochr i'r geiniog, fel arall gallwch bwnio a phrocio faint a fynnoch ac ymgolli ym myd ffantasi yr arbenigwr sy'n gwybod dim.

Gallwch gamu'n ôl i edrych o bell, nesau i graffu'n fanylach ac mae sbectol wedi ei thynnu reit i flaen y trwyn yn help, anwylo'n ddeallus â'r dwylo, a rhyw grafu gwddw yn awdurdodol a pho fwya'r gynulleidfa, mwya'n byd yw'r boddhad.