Yn ôl Gillian Bilsborough, Swyddog Amddiffyn Rhywogaethau CCGC "Mae llawer o anifeiliaid ac adar y môr yn methu goddef yr aflonyddwch sy'n gallu codi drwy ddefnyddio badau a chychod eraill ar y môr yn anghyfrifol.

Y cyfan y byddwn yn gofyn i bobl ei wneud yw defnyddio synnwyr cyffredin pan fyddan nhw'n agos at fywyd gwyllt.

Os na wnan nhw, yna mae perygl nid yn unig o darfu ar eu trefn ddyddiol a hyd yn oed rhoi niwed iddyn nhw, ond fe allen nhw fod yn troseddu, achos mae llawer o'r adar, yr anifeiliaid a'r planhigion hyn wedi'u diogelu gan y gyfraith."

Mae Côd y Môr wedi'i gynhyrchu gan CCGC ar y cyd â'r pedwar llu heddlu yng Nghymru. Mae grwp y Llywodraeth, y Bartneriaeth dros Weithredu yn erbyn Troseddau Morol hefyd wedi cymryd rhan. Dywedodd y sarjant Nick O'Brien o Uned Forol Heddlu Dyfed Powys:

"Mae Heddlu Dyfed Powys yn llwyr o blaid cyflwyno Côd y Môr achos mae hwn yn ganllaw hwylus iawn sy'n esbonio'r gyfraith bresennol - sydd ambell waith yn ddigon cymhleth - yn fanwl gywir. Os bydd pobl yn dilyn y rheolau hyn, fyddan nhw ddim yn torri'r gyfraith ar hap.

"Mae cyfreithiau bywyd gwyllt yn gwneud mwy na diogelu bywyd gwyllt, oherwydd maen nhw yno i sicrhau nad yw cefn gwlad, y traethau, adnoddau anhygoel yr arfordir, yr adar a'r anifeiliaid mae pobl am eu mwynhau yn cael eu difetha gan weithredoedd difeddwl neu faleisus criw bach."

Mae egwyddorion allweddol Côd y Môr yn cynnwys:

Peidio a gwaredu tanwydd, olew na sbwriel, yn enwedig pethau plastig ac offer pysgota, yn y môr

Peidio â nofio gydag unrhyw anifeiliaid neu adar môr, na chyffwrdd â nhw na rhoi bwyd iddyn nhw - a hynny er lles eu diogelwch nhw a chi

Os ydych mewn bad a bod anifeiliaid y môr yn dod atoch, cadwch at eich llwybr ac osgoi symud yn afreolaidd neu newid eich cyflymder yn sydyn.

Cadwch o leiaf 100 metr i ffwrdd o forloi, morfilod, dolffiniaid, heulgwn, crwbanod môr ac adar sy'n nythu ac ewch o'r fan ar ôl 15 munud.

Mae Côd y Môr ar gael oddi wrth Uned Ymholiadau Cyngor Cefn Gwlad Cymru ar 0845 130 6229.