Roedd y cynllun yn cynnwys adfer yr Hen Felin ac adeiladu o'r newydd ystafell i arddangos hanes a diwylliant y fro, swyddfeydd ar gyfer llogi teithiau, canolfan wybodaeth i ymwelwyr, siopau bychain a bwyty.

Roedd cynlluniau hefyd i wneud gwelliannau amgylcheddol i ganol y pentref. Sefydlu Cwmni Adfywio Melin Aberdaron (CAMA) fel cwmni cydweithredol cymunedol ym Mehefin 2003.

Y gobaith oedd creu rhai swyddi amser llawn a nifer o swyddi rhan amser tymhorol i bobol leol, cyrchfan ar gyfer ysgolion, mudiadau, pererinion, ymwelwyr a grwpiau o bob math.

Roedd y rhagolygon yn edrych yn addawol iawn. Cafwyd cefnogaeth i'r cynllun gan Gyngor Gwynedd, Cronfa Loteri'r Treftadaeth a CADW, a buddsoddwyd bron i £20,000 o arian cyhoeddus i sicrhau llwyddiant y cynllun. Sicrhawyd cyllid pellach o £40,000 i gyflogi pensaer i baratoi cynlluniau manwl fyddai, ynghyd a'r Cynllun Busnes, yn galluogi'r pwyllgor i wneud cais am £1 miliwn. Bryd hynny roedd y Cwmni yn edrych ymlaen yn hyderus i ddechrau adeiladu yn ystod 2005.

Yn ôl Bob Dorkins, aelod o'r pwyllgor, roedd y perchennog yn ymwybodol o'r datblygiadau drwy gydol y cyfnod ond, ar yr unfed awr ar ddeg, hysbyswyd y pwyllgor, yn annisgwyl iawn, nad oedd am werthu'r Felin na'r tir i'r Cwmni wedi'r cyfan.

Cysylltodd Y Llanw â'r Dr Osian Ellis, perchennog Yr Hen Felin, ond nid oedd yn awyddus i wneud sylw ar y mater.

"Er gwaetha'r siom, mae'r pwyllgor yn awyddus i ddal ati," meddai Bob Dorkins. "Dydan ni ddim isio i'r holl waith dros y saith mlynedd diwethaf fynd i'r gwellt yn llwyr," ychwanegodd.

"Mae'r pwyllgor yn trio'i orau i fod yn gadarnhaol. Mae 'na lawer iawn o bres wedi ei wario a rydan ni wedi hel llawer iawn o arbenigedd, ac mi rydan ni ar hyn o bryd yn ceisio gweld a oes yna opsiynau eraill. Cawn weld."