Mynychais ysgolion Deunant yn Aberdaron ac yna Botwnnog o 1977-1984: yma fe wnes ffrindiau da, a hyd heddiw yr ydym yn dal mewn cysylltiad agos.

Wedi gadael yr ysgol mi es i lawr i Gaerdydd a mynd i Goleg Addysg Uwch De Morgannwg am ddwy flynedd i astudio Diploma Uwch mewn Busnes a Thwristiaeth. Wedi'r coleg dyma ddechrau ar deithio'r byd: yn gyntaf, teithio i Los Angeles yn yr Unol Daleithiau am chwe mis. Yno, gweithiais mewn bwyty sushi a phrofais ddaeargryn yn mesur 6.1; hefyd mi wnes ymweld a San Fransisco a Mecsico.

Mi ddois yn ôl i Gaerdydd wedyn am gyfnod a gweithio mewn gwesty ac fel ymgynghorydd ariannol: roedd hon yn swydd yr oeddwn yn ei chasáu, felly dyma benderfynu gwireddu fy mreuddwyd a mynd i weithio ar yr awyrennau.

Cefais fy swydd gyntaf fel air hostess yn 1988 gyda chwmni Air Europe, ac yn dilyn chwech wythnos o hyfforddiant i ffwrdd a fi i grwydro'r byd. Wedi i gwmni Air Europe fynd i'r wal yn 1991, cefais gyfle i fynd i weithio yn y Caribi hefo Antigua & Barbuda International Airways.

Yma, tra yn gweithio yn Antigua, y cyfarfyddais fy ngŵr, Rob, ar y traeth. Roedd Rob yno gyda'i swydd fel Lieutenant Commander ar y llong HMS Arrow o'r Llynges Brydeinig, ond yn dod yn wreiddiol o Gernyw. Aeth cwmni yr oeddwn yn gweithio iddo yn y Caribi i'r wal ac mi ddois yn ôl i Brydain a derbyn swydd ymhen wythnos hefo cwmni Inter European Airways yn hedfan o Fanceinion.

Bum yn ffodus iawn o gael fy nyrchafu'n sydyn iawn yn y cwmni yma, ac yn fuan yr oeddwn yn oruchwylwraig gyda gofal am staff a theithwyr yr awyren.

Yn 1993 cafodd y cwmni yma ei brynu gan Airtours a bum yn gweithio iddynt hyd y flwyddyn 2000, yn hedfan teithiau hir o gwmpas y byd gan gynnwys Orlando yn Florida, Y Caribi, a Sydney, Awstralia. Yn ystod y cyfnod yma priododd Rob a finnau yn 1994 yn Eglwys Aberdaron a phrynu tŷ ym Manceinion.

Yn 2000 cefais swydd gyda British Airways ac roeddwn yn gweithio ar y daith hedfan gyntaf i Efrog Newydd yn dilyn yr ymosodiad terfysgol ar y Twin Towers ar Fedi 11.

Wedi colli fy ngwaith hefo BA cefais swydd hefo cwmni awyrennau siarter breifat o'r enw European Aviation yn hedfan ar y Boeing 747, sef jymbo jets. Yr oeddwn yn oruchwylwraig gyda'r cwmni yma hefyd yn gofalu am 16 o griw awyren a 464 o deithwyr.

Roedd y cwmni yma yn wahanol i gwmnïau eraill yr oeddwn wedi gweithio iddynt gan y byddem yn cael cytundebau hir o wahanol wledydd. Un tro buom yn hedfan o Jeddah yn Saudi Arabia am chwe wythnos a bu'n rhaid i mi wisgo sgarff a ffrog laes ddu i guddio'r corff.

Bu Rob a finnau'n byw am ddeng mlynedd ym Manceinion, gyda'r ddau ohonom oddi cartref lawer iawn, Rob ar y mor a minnau'n hedfan.

Buom hefyd yn byw yn Portsmouth am ddwy flynedd ac wedyn yn Llundain am ddwy flynedd a hanner. Yn 2002, fe wnaethom brynu Bodwyddog Bach, Rhiw, a threulio tair blynedd yn ei adnewyddu ar benwythnosau ac yn ystod ein gwyliau.

Ym mis Mawrth y llynedd fe rois y gorau i hedfan a dod i fyw yn llawn amser i Fodwyddog Bach, gyda Rob yn dal i weithio'n Llundain a theithio i fyny bob nos Iau. Yn ystod yr haf cefais fwynhau gweithio yng Ngwesty Tŷ Newydd, Aberdaron, a threulio amser hefo teulu a ffrindiau ym Mhen Llyn cyn i mi unwaith eto godi pac.

Erbyn i chi ddarllen hwn yn y Llanw, bydd Rob a finnau yn Sydney, Awstralia, yn byw am gyfnod o dair blynedd, gan i Rob dderbyn cyfle i weithio yno gyda Llynges Awstralia.

Felly dyma lle'r ydwyf i heddiw - yn mwynhau'r haul poeth yr ochr arall i'r byd, ond y gobaith ydyw dod yn ôl i Ben Llyn ac i Fodwyddog Bach - rhyw ddiwrnod...
Nerys Lynne Kimberley (Parry gynt).