Cafwyd bandiau jas enwog mewn lleoliadau trwy'r pentref yn ystod dydd a nos Sadwrn.

Bore Sul cafwyd gwasanaeth Gosbel, a chapel yr Annibynwyr dan ei sang. Roedd pob peth yn wefreiddiol wrth i'r band jas fod yn gerddorfa i'r emynau a phlant Ysgol Sul Y Graig wedi gwneud gwaith ardderchog.

Darllenwyd o'r ysgrythur gan Jean Williams, Llwyn. Y Parch. Janice Gourdie oedd yn arwain. Ychydig o wythnosau ynghynt trefnodd y pwyllgor bod ysgolion Abersoch, Sarn Bach, Mynytho a Llanbedrog yn cael Mr. John Glyn Jones, arweinydd Band Oakley, Blaenau Ffestiniog, a dau o'r band, sef Alan Jones ac Euros Lake i greu gweithdai cerddoriaeth offerynnau chwyth gyda'r plant. Cawsant ymateb gwych a phawb wedi mwynhau eu hunain yn fawr. Cafodd rhai o'r plant gan eu pen-blwydd i fiwsig tebot a chan dŵr blodau! Cynhaliwyd cystadleuaeth posteri hysbysebu'r Ŵyl Jas a bu'r arddangosfa yn neuadd y pentref tan ddiwedd Mehefin.

Cafodd y beirniaid dipyn o waith penderfynu gan fod gwaith pawb o safon uche1. Dyma'r enillwyr o'r gwahanol ysgolion: Abersoch - Justin Drawbridge; Sarn Bach - Mared Thomas a Rebecca Hawkinson; Mynytho - Sera Griffith; Llanbedrog - Miriam Sautin a Ffion Roberts.

Cyflwynwyd anrheg i'r enillwyr gan Thelma Mills o'r Principality a thocynnau llyfr i'r ysgolion. Dymuna'r pwyllgor ddiolch i bawb lleol sydd wedi cefnogi'r ŵyl eleni mewn unrhyw ffordd ac i bawb o'r busnesau lleol fu mor groesawus gan addurno ffenestri eu siopau. Mae'r paratoadau yn barod wedi dechrau ar gyfer 2005!