Y fo sydd wedi bathu'r gair Allt-wibio i ddisgrifio'r gamp newydd o fynd ar y byrddau sglefrio mynydd.

Byrddau tebyg i'r sglefrfyrddau ydyn nhw ond hefo olwynion mwy a sbrings, er mwyn gallu mynd dros dir gwyrdd.

Rhywbeth yn debyg i sglefrio yn yr eira. Mae llawer yn ei gweld hi'n haws na sglefrfyrddio, ac yn ôl Dafydd, mae'n gweld pobl yn gallu mynd arnyn nhw yn iawn ar ôl rhyw awr o ymarfer.

Mae Dafydd Parry, ei ferch Esme a phedwar o hogiau lleol, Glyn, Rhys, Gavin a Robert wedi eu hyfforddi i ddysgu'r dechneg.

Cynlluniwyd y llethr gan Maxtrack yr arbenigwyr sy'n gefn i'r fenter.

Cliriwyd creigiau a gosodwyd ramps ac ati i wneud llwybrau pwrpasol.

Yn ystod y gaeaf mae'n fwriad i wella'r cyfleusterau eto.

Meddai Dafydd, 'Rôn i wedi bod yn chwilio am rywbeth gwahanol i'w wneud ers blynyddoedd, clywed am mountainboarding a phenderfynu mynd amdani.'

Hawdd iawn yw deall apêl y gamp, yn enwedig mewn llecyn mor hardd â Llanfihangel, gyda golygfeydd o gylch penrhyn Llyn, Ynys Môn, Bae Nefyn, yr Eifl, Eryri a thros y môr i Ardudwy.

Absolutely amazing!' yn ôl y fisitors! Pob lwc i'r fenter newydd.