Cefais wyliau da yn mynd ar yr olwyn fawr ac ati. Ond y peth mwyaf annisgwyl a ddigwyddodd oedd clywed bod Tony Blair, y Prif Weinidog o bawb, yn dod atom i Swyn y Ddinas (cartref Ann a'r teulu) i gael te ddeg.

Y rheswm am yr ymweliad annisgwyl yma oedd hyn. Bu criw o rieni a phlant y cylch yn ymgyrchu ers blynyddoedd i gael ysgol uwchradd newydd yn y dalgylch. Euryn fy nghefnder oedd un o'r plant yma.

Bore Mawrth, Hydref 25 oedd y diwrnod mawr. Wel sôn am gynnwrf: pawb yn brysur a chyffro mawr o gwmpas y tŷ a'r stryd. Am naw o'r gloch y bore hwnnw cyrhaeddodd tri swyddog diogelwch i archwilio'r tŷ a'r ardd a bu pedwar plismon ar foto beic yn mynd i fyny ac i lawr y stryd ac wedyn yno'n cadw golwg ar y stryd hyd nes cyrhaeddodd Tony Blair.

Roedd ganddo swyddog diogelwch personol ar wahân i'r lleill a buodd yntau yn y tŷ o naw o'r gloch ymlaen. Bu'n brysur drwy'r amser yn trefnu ar y ffôn i mewn ac allan o'r tŷ.

Peth arall: roedd ganddo wn ym mhoced cesail ei gôt a dyna wnaeth i ni sylweddoli dyn mor bwysig ydy Tony Blair.

Roedd yna gryn gynnwrf yng nghegin tŷ Ann hefyd: roedd criw o rieni a phlant yn dod yno i gyfarfod y dyn pwysig. Felly roedd eisiau chwilio am lestri te taclus a lliain bwrdd go neis. Mam gafodd y gwaith o wneud teisennau cri i'r criw.

Ar ôl hir aros clywsom fod ei gar ar fin cyrraedd y tu allan i'r tŷ. Aeth Mam a fi i'r llofft i dynnu ei lun o'n cyrraedd at y tŷ.

Ras lawr grisiau wedyn i weld George, Ann ac Euryn yn agor y drws iddo. I'r parlwr at y plant yr aeth o i ddechrau i gael sgwrs a thynnu lluniau.

Wedyn drwadd i'r gegin i gyfarfod y rhieni a chael sgwrs go iawn. Erbyn hyn roedd camerâu'r teledu a'r papurau newydd wedi cyrraedd. Pum munud oedden nhw'n ei gael a mynd wedyn gan fod y cyfarfod yn un preifat.

Roedd Ruth Kelly, y Gweinidog Addysg, un ochr iddo a George, tad Mirain ac Euryn yr ochr arall. Wrth yfed te - cafodd Tony Blair gwpan orau Ann - buont yn trafod polisïau addysg.

Ar ôl y cyfarfod daeth Tony Blair yn ôl i'r parlwr a dyna pryd y buodd o'n ysgwyd llaw efo Mam. 'Hello Gwyneth, pleased to meet you', oedd ei eiriau o. Trwy hyn i gyd roedd y swyddog diogelwch yn gwarchod y drws. Beth ddywedodd o wrtha i? Wel, wrth ysgwyd llaw efo mi dywedodd 'Nice hair'. Aeth wedyn yn syth i Dŷ'r Cyffredin i drafod y papur gwyn ar Addysg. Y noson honno roedd Euryn fy nghefnder ar Newyddion Deg yn sôn am y broblem o ddiffyg ysgol uwchradd iddo yn ei gylch ei hun. Yn siŵr i chi wna'i fyth anghofio'r gwyliau yma yn Llundain efo Mirain ac Euryn.

Lois, Rhydyclafdy