Felly, yn dilyn cyfarfod cyhoeddus, daeth nifer o fusnesau at ei gilydd i ffurfio'r Gymdeithas ac agorwyd swyddfa mewn stafell yn Neuadd Abersoch lle gallai ymwelwyr gael gwybodaeth am lefydd i aros yn yr ardal a phamffledi am lefydd i ymweld â nhw tra oedden nhw ar eu gwyliau.

Gwirfoddolwyr ac aelodau a redai'r swyddfa ar y dechrau gan ehangu o dipyn i beth i gael ffôn yno, ac wedyn staff cyflogedig.

Erbyn heddiw mae'r Ganolfan Dwristiaeth wedi tyfu ac wedi'i lleoli yn ei thrydydd lleoliad, sef i lawr ar y dde ar ôl mynd heibio i'r Post i gyfeiriad yr harbwr.

Mae hon yn swyddfa go arbennig ac yn hollol unigryw yng ngogledd Cymru ac efallai trwy Gymru gyfan!

Nid canolfan i fwcio llefydd i aros mohoni, a dydy hi ddim yn cael ei rhedeg dan ambarel unrhyw fwrdd na chyngor; yn hytrach, caiff ei rhedeg gan bwyllgor gwirfoddol gweithgar sy'n cyfarfod yn fisol, a thrwy benderfyniadau sy'n cael eu gwneud yn y cyfarfod blynyddol.

Caiff ei hariannu trwy dâl aelodaeth blynyddol busnesau twristiaeth sy'n hysbysebu mewn pamffledyn lliwgar ac yn y swyddfa ei hun.

Mae'r ganolfan yn hynod bwysig i'r pentref a'r ardal gan mai yma y daw ymwelwyr i gael gwybodaeth am ddigwyddiadau, lletai, llwybrau cerdded, llefydd bwyta a nifer o bethau eraill.

Y swyddfa yma fydd pwyllgor Gwyl Jazz Abersoch yn ei defnyddio fel canolbwynt cysylltiadau trwy'r flwyddyn ar gyfer penwythnos jazz mis Mehefin.

Gwerthir llyfrau hanes Cymru a llyfrau cerdded yma; ceir cysylltiad â'r We i ymwelwyr ac eleni, am y tro cyntaf, cafwyd lluniau gan ffotograffwyr lleol wedi eu ffrarnio ar hyd y waliau gan greu awyrgylch liwgar.

Oes mae dros 20,000 o ymwelwyr yn ymweld â'r swyddfa bob blwyddyn, heb sôn am y galwadau ffôn ac ymholiadau ar y We.

Eleni, am y tro cyntaf yn hanes y Gymdeithas, yr ydym yn ehangu ein gorwelion, a bydd croeso i fusnesau twristiaeth - boed westy, llety hunan ddarpar neu wely a brecwast o bob rhan o Lŷn - i ymaelodi ar gyfer hysbysebu ym mhamffled 2008, cyn belled a'u bod wedi eu graddio gan gymdeithas gofrestredig.

Bydd busnesau o'r fath o fewn plwyf Llanengan heb eu gwireddu yn cael hysbysebu yn y pamffled hefyd - ond gydag amodau pendant.

Ac eto, am y tro cyntaf, cyhoeddir rhestr yn y bamffled ac yn y Ganolfan o 'Ffrindiau'r Ganolfan Dwristiaeth', sydd yn ein cefnogi trwy roi rhodd o £25, neu £75 i fusnesau.

Os oes gan unrhyw un ddiddordeb, mae croeso i chi ymweld â'r swyddfa unrhyw benwythnos (12:00 - 3:00) gan mai dyna pryd y mae'n agored ar hyn o bryd, neu gallwch ffonio - 01758 712929 - os byddwch am gael prisiau hysbysebu neu ffurflen aelodaeth.

Y dyddiad cau ar gyfer hysbysebion 2008 yw Hydref 25ain.