Y gamp gyntaf oedd i'r gân, Gadael, fynd trwodd i'r rownd derfynol. Yna dewiswyd Mirain Haf i ganu. Erbyn y Nadolig roedd CD o waith y ddau gyfansoddwr, gyda Mirain yn canu, ar gael yn y siopau.

Yn ôl Huw, clywed Owain Gwilym yn sôn ar ei raglen radio y byddai'n braf cael mwy o ganeuon gan Mirain, a chan yr un cyfansoddwyr, a esgorodd ar y syniad.

"Yr oedd gennym bedair cân yn cynnwys Gadael, ac yr oedd amryw wedi bod yn holi ym mhle y medrent brynu copi o honno, ond gan nad yw cynhyrchwyr Cân i Gymru yn gwerthu CD o'r caneuon nid oedd yn bosib ei phrynu yn unman. Aed i gysylltiad â Mirain a daeth i Aberdaron i glywed beth oedd ganddom i'w gynnig."

Mae'n rhaid ei bod wedi hoffi'r hyn a glywodd achos cytunodd i recordio'r caneuon. Aethant i drafod gyda chwmni Gwynfryn Cymunedol, gan feddwl gwneud demo, ond roedd y cwmni'n hoff iawn o'r caneuon ac o lais Mirain a chytunwyd i fynd ymlaen i recordio'r pedair cân, ac i Huw a Nia gyfansoddi pedair cân arall er mwyn cael yr wyth sydd ar y CD erbyn hyn.

Bu'r tri'n cydweithio ers dechrau Awst ac er bod dipyn o anawsterau, gan fod Mirain yn gweithio llawer yn Llundain, roedd y CD yn barod erbyn y Nadolig.

Y mae amrywiaeth o ganeuon o wahanol arddulliau arni megis soul, jazz, un hwiangerdd hyd yn oed, cân fywiog megis cân ddawns ac ambell faled. Y mae'r cyfan yn gymysgedd soniarus a swynol iawn a llais Mirain yn gweddu i'r dim i'r caneuon.

Gwerthwyd dros fil o gopïau o'r CD, Lle Diarth, yn barod.

Llongyfarchiadau ar eu llwyddiant. Mae hi'n amser cystadleuaeth Cân i Gymru unwaith eto (y dyddiad cau yw 19 Ionawr). 'Sgwn i a ddaw doniau Llŷn i'r amlwg eto eleni?