Mae coron yr eisteddfod wedi dod i Lŷn droeon dros y blynyddoedd, a mi oedd hi'n bleser gweld y wen ar wyneb Siân Eirian ar lwyfan y steddfod wrth iddi hithau gael ei choroni.

Mae'n rhaid tynnu sylw at gamp Guto Dafydd o Drefor. Mae Guto yn ddisgybl pedair ar ddeg oed o Ysgol Glan-y-Môr ddaeth yn ail yn yr un gystadleuaeth. Mae'n bosib iawn na fydd yn rhaid i ni aros yn hir cyn y daw'r goron yn ôl i'r ardal unwaith eto.

Ym maes celf a chrefft roedd Ysgol Hafod Lon yn amlwg iawn eleni eto, yn ogystal ag adrannau Abererch, Aberdaron a'r Rhiw, Morfa Nefyn, Rhydyclafdy, Tudweiliog, Gwrtheyrn, Coleg Meirion Dwyfor ac Aelwyd Chwilog. Da oedd gweld enwau Ysgol Botwnnog a Choleg Meirion Dwyfor mor amlwg eleni eto yn ogystal ag Ysgol Glan-y-Môr, ac adrannau Morfa Nefyn, Pentreuchaf ac Edern.

Ar lwyfan yr eisteddfod, cafodd Adran Botwnnog gryn lwyddiant, yn ogystal a Morfa Nefyn lwyddodd i ennill gyda'u cân actol am yr ail flwyddyn yn olynol. Daeth gwobrau hefyd i adrannau Mynytho, YsgolHafod Lon, Aberdaron a Rhiw ac Aelwyd Chwilog.

Mae rhestr lawn o'r rhai fu'n llwyddiannus ar lwyfan yr eisteddfod a gyda'r cystadlaethau cartref a chelf, dylunio a thechnoleg yn ogystal a lluniau i'w gweld ar dudalen 27. Llongyfarchiadau i bawb fu'n cystadlu, gan gynnwys y rhai nad yw eu henwau ymhlith yr enillwyr.

Yn Rali'r clybiau yng Nglynllifon bu aelodau clybiau'r Rhiw, Porthdinllaen a Godre'r Eifl yn brysur iawn. Enillodd clwb Porthdinllaen Gwpan Gwynedd Tractors ar gyfer y clwb gyda'r mwyaf o farciau o'r 5 clwb lleiaf, yn ogystal a Chwpan Mic ar y Meic ar gyfer dawnsio disgo.

Roedd aelodau o'r tri chlwb ymhlith y tri uchaf mewn nifer o gystadlaethau, yn amrywio o farnu Gwartheg Duon Cymreig i Ffotograffiaeth, o Wau a Chrosio i Goedwigaeth, ac o Dreialon Cŵn Defaid i Ymladd Clustogau. Unwaith eto, llongyfarchiadau i bawb a fu'n cystadlu.