Dywedodd Sue Essex AC: 'Dyma brosiect arwyddocaol iawn i Gyngor Gwynedd a Llywodraeth Cynulliad Cymru. Mae'r cynllun hirddisgwyledig yn ailsefydlu'r linc pwysig rhwng pentref Rhiw - linc a gollwyd pan gafodd y ffordd ei chau yn dilyn tirlithriad yn ystod y tywydd garw yn nhymor yr hydref 2000.

Mae'r cynllun gwerth £2.6m, sydd wedi ei ariannu gan Gynllun Cyfalaf Tywydd Garw'r Cynulliad a Chyngor Gwynedd, wedi ei gwblhau'n llwyddiannus ddau fis o flaen llaw er gwaethaf arwyneb cras y tir, coridor gwaith cul, problemau traenio a nifer o faterion amgylcheddol oedd angen sylw.'

Mae'r lôn newydd, sy'n cychwyn ger mynedfa Plas yn Rhiw ac yn rhedeg drwy ran o goetir yr Ymddiriedolaeth Genedlaethol, yn cynnwys ffyrdd mynediad newydd i nifer o eiddo a mynedfeydd i gerddwyr, sy'n galluogi i'r llwybrau aros yn agored drwy goetir yr Ymddiriedolaeth Genedlaethol.

Gwnaethpwyd gwaith hefyd ar hyd yr hen ffordd, fel y gellir ei defnyddio fel llwybr merlota fydd yn cysylltu'r nifer o lwybrau troed sydd yn rhedeg drwy'r coetir, y llwybr cyhoeddus newydd a'r rhwydwaith ffordd newydd.

Rhoddwyd blaenoriaeth mawr i faterion amgylcheddol drwy gydol y prosiect, gyda nifer o archwiliadau'n cael eu cynnal ar gyfer nifer o rywogaethau prin, gan gynnwys moch daear, ystlumod, pathewod ac ymlusgiaid.

Defnyddiwyd amryw o dechnegau walio sych a gwnaed defnydd o garreg leol a ganfuwyd ar y safle. Gwnaethpwyd pob ymdrech i dynnu cyn lleied ag oedd yn bosib o goed o'r safle a gellir gweld canlyniad hyn mewn sawl lleoliad ar hyd y ffordd, ble mae coed aeddfed yn tyfu yn agos iawn i'r ffordd newydd.