| Bu Ysgol Nefyn yn ffodus iawn i gael gafael ar bêl droed wedi'i harwyddo gan Dîm Cenedlaethol Cymru. Mae hi'n bêl arbennig iawn gan mai hon oedd yr un a ddefnyddiwyd gan y tîm yn y gêm ryngwladol ddiweddar yn erbyn Gwlad Pŵyl. Bu'r ysgol yn ffodus iawn i gael y bêl, ynghyd a thiced a rhaglen o'r gem, i'w helpu i godi arian at yr ysgol gan un o'r rhieni. Meddai Mr Arwel Jones: "Mae'r bêl yn un arbennig iawn. Hon oedd y bêl a ddefnyddiwyd yn y gêm olaf a chwaraeodd tîm Cymru o dan Mark Hughes fel Rheolwr. Mi fydda i'n sicr yn rhoi cynnig i mewn." Bydd yr arian yn mynd tuag at gostau yr wyth bwrdd gwyn rhyngweithiol sydd wedi'u gosod ym mhob dosbarth yn yr Ysgol. "Mae'r Byrddau Gwyn yn gaffaeliad mawr i'r ysgol. Mae Cymdeithas Rhieni / Athrawon yr ysgol wedi cyfrannu'n aruthrol i godi arian i brynu'r offer newydd yma, ac mae cyfraniad y bêl yn help mawr i ni," meddai Mr Jones. "Hoffwn hefyd ddiolch o galon i deulu'r Andersons, fu'n helpu i wneud y gwaith cysylltu a'r ocsiwn ar y we." Dydd Llun oedd y diwrnod cynhyrfus pan oedd y cyfle olaf i roi cynnig, a chyda dim ond munudau ar ôl i roi cynnig ymlaen, enillodd Michael Brady o Nefyn y bêl werthfawr am fargen - £151. Am fwy o hanes yr ysgol trowch i mewn i safle we Ysgol Nefyn. 'Dyw'r BBC ddim yn gyfrifol am gynnwys gwefannau allanol.
 | 
