A beth sydd a wnelo hynny a bro'r 'Eco'? Wel, darllenwch ymlaen.

Pianydd ifanc dawnus dros ben oedd wrth yr offeryn. Lansio Caru Nodyn, nofel newydd Gareth William Jones, oedd yr achlysur.

Penderfynwyd lansio'r nofel yng nghyfarfod Adran yr Urdd yn yr ysgol am mai ar gyfer plant o wyth i un ar ddeg . oed y mae hi wedi'i hysgrifennu.

Yn hytrach na chanolbwyntio'n llwyr ar y llyfr ei hun, fodd bynnag, trowyd yr achlysur yn ddathliad o'r piano.

Hanes merch fach o'r enw Shauna yw'r nofel, sydd yn gorfod mynd i gael gwersi piano bob wythnos ac sydd yn eu casáu nhw, ac yn casáu ymarfer hyd yn oed yn fwy. Yr unig air y gallai hi feddwl amdano i fynegi cymaint roedd hi'n casáu'r holl beth oedd ychafiofnadwyaethus'.

Yn ei gyflwyniad i'r plant esboniodd yr awdur ei fod yn gwybod yn iawn am y profiad hwnnw gan ei fod yntau, pan yn blentyn, wedi bod yn amharod i ufuddhau a cheisio meistroli'r nodau du a gwyn. Yn unol a phroffwydoliaeth ei fam bu'n edifar ganddo.

Ond bu Shauna'n fwy ffodus na'r awdur. Un diwrnod daeth Nodyn, cath ddu a gwyn ei hathrawes biano, yn rhan o'i bywyd a digwyddodd pethau rhyfedd iawn yn sgil hynny.

Heb ddatgelu unrhyw gyfrinach, erbyn diwedd y stori galli Shauna chwarae'r Noctwrn Rhif 2 yn E Fflat gan Frederic Chopin.

Wrth drefnu'r cyfarfod lansio, cafodd yr awdur y syniad y byddai'n beth da cael plentyn tua'r un oed a darllenwyr y nofel i chwarae'r union Noctwrn honno yno.

Ond ble roedd dechrau chwilio? Barn arbenigwyr dysgu cerdd oedd y byddai'n orchwyl amhosibl. Daliwyd ati fodd bynnag ac, o'r diwedd, daethpwyd o hyd i bianydd ifanc o'r enw Math Roberts, disgybl yn Ysgol Gynradd Llanrug.

Braint a chyfaredd i bawb a oedd yn y cyfarfod, yn oedolion a phlant, oedd clywed Math, ag yntau'n ddim mwy na naw mlwydd oed, yn rhoi datganiad hyfedrus a sensitif o'r gwaith anodd hwn, a hynny gyda phurdeb a glendid diymffrost. Bu'n wefr yn wir.

A chafodd cynulleidfa yn Eisteddfod Bentref Llanrug y cyfle i wrando ar Math yn perfformio'r Noctwrn yno hefyd - a hynny ar y cof, heb ddefnydd copi o gwbl. Llongyfarchiadau mawr i ti Math.

Mae'r 'Eco' yn ddiolchgar i bapur bro 'Tincer' am anfon y stori a'r llun o'r achlysur.