Mewn cyfarfod diweddar o Gyngor Cymuned Llanrug fe drafodwyd y mater a thynnwyd sylw at sawl lleoliad peryglus yn yr ardal.

Un o'r rheiny oedd croesffordd yr Efail a Ffordd Glanmoelwyn, Llanrug. Mae nifer o drigolion yn poeni y gallai damwain ddigwydd yn y dyfodol gan fod trafnidiaeth cyson a phrysur yn defnyddio'r groesffordd. Yr hyn sy'ngwneud y sefyllfa yn waeth yw bod cymaint o blant yn byw ac yn chwarae yn ei hymyl - ac mae galw am rhyw ddull o arafu'r traffig.

Mynegwyd pryderon hefyd am ardal Tan-y-Coed a Bryngwyn. Yn gyntaf mae angen gwella cyflwr ochr y ffordd o Groeslon Marc i Groesffordd Bryngwyn, ond hefyd mae nifer yn poeni am ddiogelwch y ffordd o Fecws Bryngwyn i lawr i Dan-y-Coed.

Gan fod ceir yn cael eu parcio o flaen y tai a cheir yn trafaelio ar hyd y ffordd yn llawer rhy gyflym, mae'n lôn beryglus - yn enwedig gan fod becws boblogaidd a maes carafannau ar groesffordd Bryngwyn. Mae hefyd yn anodd iawn i gerddwyr gael lle i gerdded yn ddiogel yma.

Yn ddiweddar bu un o'r trigolion mewn cysylltiad efo 'Siwrnai Saff', sy'n ymgyrchu i wneud ffyrdd Gogledd Cymru yn saffach drwy annog unigolion i gadw at y cyfyngiadau cyflymder, er mwyn tynnu sylw at y broblem.

Gosodwyd offer mesur traffic ar y stryd 'nôl ym mis Ebrill ac mae'r canlyniadau yn cadarnhau'r pryderon.

Roedd 61% o'r drafnidiaeth yn goryrru dros y 30mya, gyda'r rhan fwyaf o'r rhain yn gyrru ar gyflymder o 39mya - bron i draean yn uwch na'r cyfyngiad cyflymder.

Ond yr hyn sy'n fwy syfrdanol yw bod un car wedi bod yn gyrru ar 77mya. Fe ddigwyddodd hyn yn ystod oriau mân y bore - ond roedd gweddill y cyflymderau uchaf hefyd dros 50mya. Mae'r wybodaeth nawr wedi ei basio ymlaen i Heddlu Gogledd Cymru.

Hefyd yn y cyfarfod cymuned roedd trafod ar broblemau traffic yn ochra Cwm y Glo. Gan fod ceir yn cael eu parcio ar ddwy ochr y ffordd yn y pentref, nid yw cwmni bysiau KMP yn gallu gyrru drwy'r pentref yn gynnar yn y bore nac ar ddiwedd y dydd. Mae hyn yn achosi pryder i'r bobl hynny sy'n llwyr ddibynnol ar drafnidiaeth gyhoeddus.

Hefyd bydd cyfyngder cyflymdra o 40mya yn cael ei roi ar y ffordd A4086 o Gwm y Glo i Lanrug. Mae'r cyngor wedi gofyn am welliant i hyn a chael y cyfyngiad i gychwyn o'r tu draw i'r Fricsan gan bod y ffordd yn achosi pryder i nifer yn yr ardal.