Braint yw cael nodi yn yr Eco i dîm blwyddyn 8 Bethel gipio'r darian genedlaethol.

Capten y tîm oedd Daniel Bell a'i gyd-aelodau oedd Gerallt Bryn, Gruffydd John, Aaron Gwyn, Mathew Edwards ac Aled Jones. Mae'r chwech ohonynt wedi hen arrer cydweithio gan eu bod yn chwarae'n gyson i dîm yr ysgol ac i dim y pentref.

Ar gaeau Maes Glas bu timau o bob cwr o Gymru yn brwydro am y darian, a chriw Bethel yn llwyddo i drechu Rhuthun yn y ffeinal i'w chipio. Yn ôl Gerallt Jones, un o aelodau'r tîm buddugol: 'Mi wnaethon ni fwynhau'r diwrnod yn fawr ac mi roedden ni'n hapus iawn ein bod ni wedi curo.'

Dwi'n siŵr eich bod chi, hogia! Da iawn chi. Braf yw gweld criw ifanc o fro'r Eco yn llwyddo ar lefel genedlaethol. Dymuna'r hogiau ddiolch yn fawr iawn i Swyddfa Bost Bethel am roi cartref i'r darian.

Braf yw cael llongyfarch y tim hŷn o Fethel hefyd, sef tîm blynyddoedd 9 a 10. Mae'n rhaid fod pêl-droed yn y gwaed ym Methel gan i'r tîm hwn hefyd lwyddo i ddod yn ail drwy Gymru. Yr aelodau oedd Cai Jones, Robin Jones, Sion Elwyn, Dyfan Coles a Huw Griffiths.

Llongyfarchiadau mawr i'r ddau dîm.