O flaen torf o 50,000 a chamerâu Sky a'r BBC, fe gafodd y tîm bychan lleol lwyddiant wrth gystadlu yn erbyn timau mawr proffesiynol fel Honda a Suzuki.
A chymaint oedd eu llwyddiant, mae nhw rŵan wedi cael eu gwahodd ar gyfer y flwyddyn nesaf.
Llongyfarchiadau mawr i'r tîm - Bryn Taff, y rheolwr, a'r noddwr o Lanrug, Alffi, y mecanic a'r dyn sy'n llywio'r beic modur, Bryn Owen o Nebo.
Mae rhyw ramant ym myd y campau pan y mae Dafydd - boed yn unigolyn neu dîm - yn herio Goliath. Credais erioed mai gwir ddiffiniad o'r campwr amatur oedd yr un a chanddo hyder yn ei allu i herio gwrthwynebydd o allu uwch. Yn yr herio y megir profiad. Hawdd yw bod yn bysgodyn mawr mewn pwll bach.
Yn sicr, mae rhamant yng nghroniclo profiad tîm rasio beiciau modur Bryn Taff, o Lanrug, yn ddiweddar. Cafodd y tîm yma sylw gennyf o'r blaen, yn sgîl eu perfformiadau yng Nghystadlaethau trac Tŷ Croes a draw yn Swydd Caer. Soniais am gyfraniad Bryn fel noddwr a rheolwr, Alffi fel mecanic amryddawn, a Bryn Owen o
Nebo, sy'n llywio'r beic Honda 125cc.
Yng nghyswllt Tŷ Croes, bu'n dymor llwyddiannus i'r tîm. Gyda dim ond un ras yn weddill, yr Anglesey Grand, maent yn arwain Pencampwriaeth y Wirral Hundred Club a Phencampwriaeth Clybiau Swydd Caer a Nantwich. I goroni'r tymor, mae Bryn newydd dorri'r record am gyflawni ras saith cy1ch yn Nhŷ Croes - record a safodd am bum mlynedd.
Rhaid cofio nad camp rad yw hon. Gall set o deiars rasio gostio £200, a gall holl gostau un ras fod cyn gymaint a £700. Mae hyn yn gryn ofyn ar dîm rasio bychan o gefn gwlad Cymru. Y mae cefnogaeth barod eu noddwyr lleol yn holl bwysig.
Yna'r rhamant. Dros yr ail benwythnos o Fedi, mentrodd y tri i ffau'r llewod, yn llythrennol. Penderfynwyd llwytho'r fan a'i hanelu am Oulton Park, a'i gosod wrth ochr artics Honda, Suzuki ac ambell i Oliath mawr arall y gamp. Y gyrrwr o Nebo ymysg gyrwyr oedd yn ennill hyd at £60,000 am gynrychioli'r timau gwaith.
Bryn Taff, Alffi a Bryn Owen yn syllu'n gegrwth ar gyfarpar y gwrthwynebwyr:
"Newid teiars, fel eu bod nhw'n tyfu ar goed," chwedl Bryn, ac yntau yn gwarchod un pâr fel petaent y rhai olaf ar y ddaear.
Yr achlysur oedd y Grand Prix Prydeinig, a denwyd torf o 50,000 a chamerâu Grandstand a Sky i wylio'r rasus yn y gwahanol ddosbarthiadau.
Ar y dydd Gwener dibynnu ar ddawn Alffi i baratoi y beic. Dau sesiwn o hanner awr i Bryn gael cynefino â'r cwrs, gan fod rhaid bod yn barod yn dechnegol a meddyliol am y Rownd Ragbrofol ar y Sadwrn.
Daeth y glaw fore Sadwrn. Mwy o ofyn am ddoniau Alffi. Dewis y teiars cywir a gosod y gears i gyfateb â gofynion Bryn. Roedd Bryn Taff yn nerfus, gan syllu ar y llu profiad yn y timau eraill. A allai Bryn Owen ymateb i'r her?
I fynd trwodd i'r rownd derfynol, roedd gofyn i Bryn fod o fewn 110% o amser y buddugwr. Dechreuodd 45 y rhagras, ond dim ond 35 a gyflawnodd y gofynion. Roedd Bryn Owen yn safle 30, ac felly trwodd i'r 'ras fawr'. Roedd rhai mwy profiadol wedi boddi wrth ymyl y lan. Un peth oedd mentro.
Anhygoel oedd hawlio'i lle yn haeddiannol yn y Grand Prix ei hun. Roedd tipyn o ymsythu a balchder yng ngherddediad Bryn Taff tuag at stondin Dunlop i brynu par o 'slics' newydd ar gyfer trannoeth. Yr oeddynt wedi ennill eu lle, ac eisoes yn denu llongyfarchion a chanmoliaeth gan y timau eraill. Yr oedd y ddraig yn chwifio - a chwythu!
Gwaith dros nos eto i Alffi. Dyma'r prawf mwyaf o'i allu hyd yn hyn. A allai Bryn Owen o Nebo bell ddal ei nerf o flaen 50,000 o dorf?
Galwyd y 35 i'r cychwyn a Bryn yn safle 30 ar y grid. Ras o 14 cylch, a derbyniodd Bryn yr her. Ei gyfartaledd cyflymdra oedd 85 m.y.a., gyda'i amser gorau am un cylch yn 1 munud 51 eiliad. Ei safle terfynol? Yn anhygoel, safle 24 allan o'r 35. Yr oedd y tîm bach wedi hawlio ei le, ac roedd y sylw a roddwyd iddynt yn siarad cyfrolau am faint cyflawniad y tîm rhyfeddol yma.
Mae cryn edrych ymlaen yn barod, wedi iddynt dderbyn gwahoddiad ar gyfer y flwyddyn nesaf.
Ymfalchïwn ym menter tîm rasio Bryn Taff, ac mae yntau eisiau diolch i'r canlynol am eu nawdd parod. Rwy'n siŵr na wrthodir cyfraniad ariannol unrhyw un i gynnal fflam y freuddwyd yn fyw.
Garej Gwalia; Owen Glyn Owen a'i Fab (Cigydd); Black Boy, Caernarfon; O'Grady Plant Hire; Ty'n Lon Volvo, Llanfairpwll; Express Motors; Snowdon Aquatics; J. M. Rowe, Deintydd; T. J. Fixit; Garej Arwyn, Pen-ygroes; Alan Wyn,. Caerloyw; Regency Signs; Menai Freight Services; H. F. Owen, Bethel; Neil Broda Surfacing; Gors Bach; Cen ap Tomos; Neil Zammit; Cronfa Goffa Robin Jac; Gwilym a Dennis, Y Fali; Dic a Meirwen, Caer Maen; John a Morfudd, Bryn Coch; Meilir ac Eleri; Weldspar Waenfawr; Caffi Cibyn a Tim, Garej Beran.
