Daeth y cyhoeddiad hwn wedi wythnosau o waith caled gan Shadek Ali - neu 'Sid' fel yr adwaenir ef gan ei gwsmeriaid ffyddlon.

Rhannwyd y gystadleuaeth yn dair rownd: y cwsmeriaid oedd yn gyfrifol am y rownd agoriadol, ac mi fuon nhw'n pleidleisio'n ddiwyd er mwyn cyrraedd y rhestr fer o ddeg bwyty: tipyn o gamp i'r bwyty lleol o ystyried fod y naw arall wedi eu lleoli yng Nghaerdydd!

Yn yr ail rownd ymwelodd panel o feirniaid i'r bwyty ac ar ôl cael eu plesio, fe gyhoeddwyd fod Sopna wedi cyrraedd y tri olaf.

Ar gyfer y rownd derfynol teithiodd Sid a'i gogydd i Gaerdydd, ble bu'n rhaid iddyn nhw goginio pryd i banel arall o feirniaid.

Yn dilyn hynny, cyhoeddwyd mai Sopna oedd pencampwyr tai Bwyta Indiaidd Cymru.

Wrth drafod ei lwyddiant soniodd Shadek am gyfraniad ei gogydd, Mashuk Ali:

"Dan ni'n hynod ffodus o gael cogydd sydd â dros ddwy flynedd ar hugain o brofiad o goginio bwyd Indiaidd,' meddai.

Mae Shadek Ali yn ymwybodol iawn o leoliad ei fwyty ac o Gymreictod yr ardal.

Mae o'n teimlo'n gryf ei bod yn bwysig cyflogi pobl leol ac yn falch iawn fod aelodau o'i staff yn ddwyieithog.

Mae'n siarad 'dipyn bach' o Gymraeg ei hun ac yn hyderus y bydd yn hollol rhugl mewn tair blynedd. Pob lwc!