Mae gwaith ymchwil gan Brifysgol Bangor a Chyngor Cefn Gwlad Cymru yn dangos bod lefelau eira wedi gostwng tua 35% dros y 10 mlynedd diwethaf ac mae'r llinell eira presennol tua 300 medr yn unig o'r cop a wrth i dymheredd y gwanwyn godi 2.5 Gradd C ar Yr Wyddfa dros y 30 mlynedd diwethaf.

Mae nifer o ffactorau'n gyfrifol am y newid sylweddol hwn yn ein hinsawdd -alloriannau carbon monocsid a carbon deuocsid, llygredd a sbwriel gwenwynig.

Mae'n sefyllfa ddyrys iawn ond mi allwn ni wneud rhywbeth i geisio lleddfu'r broblem, yn ôl Gwenllian Dafydd, Swyddog Gwastraff ac Ailgylchu Cyngor Gwynedd: 'Mae pob un cyngor yn derbyn targedau ailgylchu'n flynyddol er mwyn lleihau'r maint o wastraff a gynhyrchir bob blwyddyn. Yma yng Ngwynedd, mae'n rhaid inni gyrraedd y nod o ailgylchu 40% o'n gwastraff erbyn 2009-2010, sy'n ffigwr uchelgeisiol iawn o gofio mai dim ond 25% o'n sbwriel 'dan ni'n ailgylchu ar hyn o bryd.'

Mae pob un ohonom sy'n darllen papur newydd neu'n gwylio'r teledu yn ymwybodol o ddifrifoldeb cynhesu byd eang ond faint ohonom sy'n poeni o ddifri am yr effaith andwyol mae'n ffordd ni o fyw yn ei gael ar ein hamgylchedd? Faint ohonom sy'n ailgylchu'n rheolaidd? Mae gan sawl cartref yng Ngwynedd foes glas ar gyfer ailgylchu papur gwyn, tuniau, gwydr, dillad a sgidia ac mae croeso i bobl ffonio'r Cyngor os ydyn nhw angen mwy o'r bocsys hyn.

Yn ôl Gwenllian Dafydd: 'Mae llawer o bobl yn gofyn inni a oes gwasanaeth ailgylchu plastig ar gael yn yr ardal, a'n gobaith ni yw y bydd hynny'n bosib o fewn y misoedd nesaf. Y broblem fwyaf efo ailgylchu plastig yw ei fod yn cymryd llawer o le ond nid yw'n pwyso llawer; ond, wedi cynllun peilot llwyddiannus iawn yn Llanrug rydan ni'n ffyddiog y bydd gweddill y sir yn elwa yn fuan. Yn y cyfamser, mae posib ichi gludo'ch gwastraff plastig i un o'n canolfannau ailgylchu. Yr un agosaf yw parc diwydiannol Llandegai, Bangor.'

Cynllun newydd arall sydd ar y gweill yw gosod biniau olwyn brown mewn 8,000 o gartrefi yn Arfon er mwyn ailgylchu gwastraff gardd - chwyn, gwair a hen blanhigion - a fydd yn cael eu casglu bob pythefnos. Os ydach chi'n arddwyr brwdfrydig mae modd ichi gael biniau compost yn rhad ac am ddim gan y cyngor - er mwyn ailgylchu'ch gwastraff gardd a'ch gwastraff cegin.

Yn ôl Gwenllian: 'Drwy gynnig nifer o wasanaethau ailgylchu amrywiol, ein gobaith yw y bydd Gwynedd yn sir werdd iawn erbyn 2009/10, a gyda'n canolfan newydd 'Caergylchu' yn agor yng Nghibyn, Caernarfon, cyn bo hir dylai'r dyletswydd sydd ar bob un ohonom ni i ailgylchu fod yn haws i'w weithredu.'

O fewn yr wythnosau nesaf NI FYDD modd gadael mwy nag un llond bin olwynion neu dair sach du o sbwriel ar gyfer y lori sbwriel, mewn ymgais i geisio lleihau maint y sbwriel rydan ni'n cael gwared ohono'n wythnosol. Felly bydd yn RHAID i bawb ailgylchu.