| Wythnos diwethaf roedd 'Aer Clir Eryri' - potel wedi ei lenwi efo aer cefn gwlad Eryri - ar wefan eBay. Mae'r wefan yn hynod o boblogaidd ar draws y byd gyda gwerthwyr yn rhoi pob mathau o eitemau ar y safle - o lyfrau, recordiau a cheir i bethau mwy anghyffredin. Gall unrhyw un fynd ar y safle i weld beth sydd ar werth, lle mae disgrifiad a llu o'r eitem wedi ei osod. Mae wedyn y bosib 'bidio' am yr eitem yn union fel mewn ocsiwn arferol - a'r pris uchaf sy'n cael yr eitem. Ond ychydig o ddiddordeb oedd yn 'Aer Clir Eryri'. Roedd gwerthwr yr aer - sy'n dod o ogledd Cymru - wedi rhoi'r botel ar werth ar 10 Ionawr, gan gynnig potelu'r aer y diwrnod oedd yn cael ei brynu, a'i yrru i unrhyw le yn y byd. Roedd yr eitem ar werth am 10 diwrnod, ond dim ond un bid gafodd ei gynnig - am 99c. O edrych ar y safle gwe mae'n ymddangos mai gŵr o'r enw Robin Walmsley wnaeth brynu'r eitem ond does dim manylion ynglŷn â phwy ydyw nac o le mae'n dod. Ond y Post Brenhinol sydd wir ar ei ennill, gan fod y prynwr yn gorfod talu £2 ar gyfer dosbarthu'r eitem os yn byw ym Mhrydain, neu £10.50 os yn byw yn America. Efallai bod y gwerthwr - kfpromos yw'r enw sy'n cael ei roi ar y safle gwe - wedi gobeithio gwneud arian allan o'r fenter fel mae rhai wedi'i wneud eisoes drwy eBay. Rai blynyddoedd yn ôl gwerthwyd jet preifat ar y safle am £1.87m - ac fe brynwyd tref Briedgeville, California, am £l.lm. Dyma sut oedd 'Aer Clir Eryri' yn cae ei ddisgrifio ar y safle: "Fresh Air caught on the breeze in the heart of the Welsh Countryside. AER CLIR ERYRI."
 | 
