Mae hyn i gyd yn cael ei ddangos mewn rhaglen deledu arbennig sydd wedi ei gwneud am Seindorf Arian Llanrug.
Bu'r cynhyrchydd teledu, Gwenan Pennant Thomas yn dilyn y band ar ei daith i frig byd y bandiau yn dilyn blynyddoedd o siom a cholli.
"Am flynyddoedd maith mi fuo'r band yn colli ond gydag arweinydd newydd, Gavin Saynor wrth y llyw a'r cadeirydd ifanc, Berwyn Owen, yn llawn brwdfrydedd mi roeddan ni yn dilyn band oedd i ffordd i fyny!" meddai Gwenan sy'n gynhyrchydd gyda BBC Cymru ym Mangor.
Does dim amheuaeth am bwysigrwydd y band i drigolion Llanrug.
"Ma'r holl bentra'n dod at i gilydd i hel pres i'r band fynd i gystadlu yn Dundee. Y pwyllgor merched yn gwerthu cacennau ar y Maes yng Nghaernarfon a'r aelod ieuengaf, Aled sy'n 14 oed, yn golchi ceir yn y pentref i'r band," meddai.
Bu Gwenan yn dyst hefyd i wefr y cystadlu, y paratoi ymlaen llaw, y perfformiadau ar lwyfan a hyd yn oed y siom o golli ddwywaith ar ôl ei gilydd a hynny un tro i'r arch-elyn, Band Deiniolen - pentref sydd ond tafliad carreg go lew o Lanrug.
Ond er gwaethaf pob colli mae yna fôr o hiwmor a ffraethineb hefyd wrth i'r band ddal ati er gwaethaf pob siom a dod o hyd i lwyddiant ym Mhencampwriaeth Bandiau Pontins fis Hydref 2003.
Bydd Y Band gan BBC Cymru ar S4C, ddydd Gwener Ionawr 2 am 8.25 y nos.Cliciwch i gael gwybod mwy am
Yr Arweinydd
Y Cadeirydd
Aelodau eraill
 | 
