| Eisoes cyhoeddwyd wyth cyfrol o'r colofnau radio, a'i ddymuniad ef oedd bod y gyfrol hon hefyd yn cael ei chyhoeddi. Dros y misoedd diwethaf bu Alun Rhys, cynhyrchydd y colofnau radio, yn pori drwy dros 250 o sgriptiau rhaglenni a ddarlledwyd rhwng Medi 1999 a'r 18fed o Fedi 2004, sef y rhaglen olaf, gan ddewis a dethol y rhai i'w cynnwys. "Wrth gwrs, gan fod 'na golofn wythnosol, roedd 'na doreth o sgriptiau dros y blynyddoedd, a braint enfawr oedd bod John Roberts Williams wedi gofyn i mi baratoi'r llyfr hwn," meddai Alun Rhys. "John ddewisodd y teitl ac roedd yn gyfrifoldeb mawr i ddewis a dethol o'r sgriptiau, yn ogystal â bod yn bleser pur hefyd, ac yn atgoffa rhywun o ehangder a manylder ei wybodaeth," ychwanegodd. "Fy ngobaith i yw y bydd pobl yn cael cymaint o foddhad o ddarllen y colofnau ag a gefais i yn eu dewis," ychwanegodd. Bu John Roberts Williams yn darlledu'r colofnau radio hyn yn ddi-dor am 29 mlynedd, ffaith sydd yn fwy o gamp o ystyried mai ar ôl iddo ymddeol y cychwynnodd y gyfres. Bydd y gyfrol ola yn cynnwys tua 50 o golofnau amrywiol o'r cyfnod rhwng Medi 1999 a 2004, ynghyd ag ambell sgwrs o gyfnod yr 80au cynnar sydd heb eu cyhoeddi o'r blaen. Yn y colofnau ceir cyfuniad aml o'r rhyngwladol i'r cenedlaethol i'r lleol, ac mae'r gyfrol yn cynrychioli'r pynciau a oedd yn agos at galon y darlledwr yn y blynyddoedd diweddar, megis y Cynulliad a'r rhyfel yn Irac. Cyhoeddir Ffarwél i'r Sbectol gan Wasg Gwynedd ym mis Gorffennaf.
 | 
