| Cynhaliwyd noson gymdeithasol yn Y Caban, Brynrefail, er mwyn casglu arian i MacDonald House 'nol yn mis Medi, ond cadwyd y coffrau ar agor am nifer o wythnosau gan bod cymaint o bobol nad oedd yn medru mynd i'r noson eisiau cyfrannu.
Ychydig wythnosau cyn Y Nadolig aethpwyd â'r arian - £1,918 - a'i gyflwyno i'r elusen yn Lerpwl. Lle aros sy'n cael ei redeg ar gyfer teuluoedd plant sy'n cael triniaeth yn ysbyty Alder Hey yw 'MacHouse'.
Mae nifer fawr o deuluoedd gogledd Cymru yn cael budd o'r lle, rhai yn byw yno am fisoedd ar y tro yn rhad ac am ddim. Mae'n galluogi rhieni i fedru bod ond ychydig funudau i ffwrdd oddi wrth eu plant yn ystod y nos, ac yn tynnu'r straen o orfod chwilio am westy mewn dinas ddieithr ar fyr rybudd pan bod digon i boeni amdano yn barod. Trefnwyd y noson gan deulu Buddug a gafodd lawdriniaeth ar ei chalon yn Alder Hey ym mis Chwefror 2007. Mae Buddug bellach yn flwydd a hanner ac yn mynd o nerth i nerth. Dywedodd ei mam, Gwenan: 'Diolch o galon i bob un a wnaeth gefnogi'r noson. Mae pawb wedi bod mor garedig.'
 | 
