Pe bai'r cais yn cael ei ganiatáu gallai olygu colled yn y gwasanaethau a gynigir gan y ddwy feddygfa'n y pentref. Deallwn fod y cais wedi ei wneud i Fwrdd Iechyd Gwynedd gan ddau fferyllydd o Fôn.
Derbyniodd yr Eco ddatganiad gan feddygon y Waunfawr yn tanlinellu'r bygythiad i'w practis, a chyhoeddir ef yma er gwybodaeth.
Bygythiad difrifol i'n practis
Fel eich meddygon teulu, teimlwn y dylem eich hysbysu o fygythiad difrifol i'n Practis.
Gwnaethpwyd cais, gan Mri Carr a Barlow, i Fwrdd Iechyd Lleol Gwynedd i agor siop fferyllydd Llanrug ar Ffordd yr Orsaf, Llanrug.
Pe bai'r cais yma yn llwyddiannus, byddem ni fel Practis, yn ogystal a'n cyd-feddygon cyfagos yn
Llanberis, yn colli'r hawl i ddosbarthu moddion i unrhyw glaf sy'n byw o fewn milltir i'r fferyllfa arfaethedig.
Golyga hyn y byddem yn colli incwm sylweddol ac y byddai'n rhaid colli aelodau o'r staff, ac yn bendant un o'r meddygon.
O ganlyniad, byddai gostyngiad sylweddol yn y gwasanaeth i
bentref Llanrug.
Hyderwn eich bod wedi cael y gwasaneth meddygol gorau gennym dros y blynyddoedd.
Yn anochel, byddai colli meddyg yn golygu dirywiad yn ansawdd y gofal yma, nid yn unig i'n cleifion yn Llanrug, ond i bob un o'r 5,000 a mwy o boblogaeth y Practis.
Teimlwn yn gryf y dylai'r Bwrdd Iechyd wrthod y cais yma.
Os ydych chi'n gwerthfawrogi'r gofal meddygol a dosbarthu a roddwyd i chi a'ch teulu dros y blynyddoedd yn Llanrug, byddem yn falch o'ch cymorth.
Os ydych chi'n credu fod meddyg yn Llanrug yn fwy o fudd i chi a'r teulu na fferyllydd, fyddech chi cystal ag ysgrifennu mor fuan â phosibl i: Emma Williams
Canolfan Gwasanaethau Busnes
GIG Cymru
Tŷ Cwmbrân
Ystad Parc Mamhilad Pontypwl
Tor-faen
NP4OXS
emma.williams2@bsc.wales.nhs.uk
Os nad ydym yn barod i ymladd yn gryf yn erbyn y cais yma, teimlwn na allwn barhau gyda'r gofal meddygol rydych wedi arfer ei gael dros y blynyddoedd.
Diolch yn fawr. Huw L Roberts, Esyllt Llwyd, Gruffudd Penrhyn Jones, Huw Gwilym
