Erbyn hyn, mae'r enw 'Wavell' yn adnabyddus iawn yn yr ardal a rhai yn dod o bell i brynu cynnyrch yn ei siop yn Llanrug ond ar ôl cyfnod prysur y Nadolig, bydd y cigydd yn rhoi'r gorau i redeg ei fusnes.
Er ei fod yn gigydd llwyddiannus ac wedi ennill degau o wobrau am ei gynnyrch, gyda rhai o fwytai gorau'r ardal yn gwsmeriaid iddo, bu bron i'r siop beidio â bod - ac mae'r diolch i'w wraig, Elizabeth, am ei berswadio i gymryd y fenter.
"Ar y dechra mi roeddwn i'n reit nerfus" meddai Wavell. "I ddweud y gwir y musus wnaeth fy mherswadio fi i fynd amdani achos doedd gen i ddim profiad efo'r ochr rhedeg busnes o gwbwl ond mi wnaeth hi fy mherswadio fi i fynd amdani. Doedd hi ddim yn hawdd ar y dechrau ac mi roedd hi'n galed iawn, iawn arno ni am dipyn o flynyddoedd ond mi ddaeth."
O ran yr ochr trin cig, roedd gan Wavell eisoes flynyddoedd o brofiad gan iddo ddechrau ar ei yrfa fel cigydd pan yn 11 oed. Roedd yn byw dros y ffordd i'r Foelas, Ffordd yr Orsaf, Llanrug - cartref i'r henoed erbyn hyn, ond siop cigydd yn y 50au. Gyda'r nosau ac ar ben wythnosau roedd Wavell yn helpu yn y siop - yn gwneud pob dim, o lanhau'r fan i fynd ar gefn beic i fynd a chig i gwsmeriaid. Ar ôl gadael yr ysgol aeth Wavell i weithio i Chwarel Dinorwig yn 1956 a dechrau teulu yn Llanberis efo'i wraig Elizabeth. Roedd yn dal i weithio gyda'r nosau yn y siop gig ond fe ddaeth hyn i ben pan aeth y siop ar werth yn 1965.
Er ei fod yn awyddus i brynu'r busnes doedd o ddim yn benderfyniad hawdd i fuddsoddi arian ac amser i'r fenter ac yntau'n dechrau magu teulu ifanc - gyda dau o blant bach ar yr aelwyd yn barod, ond gyda chymorth eraill, fe wnaeth Wavell fedru dod i gytundeb a phrynu'r busnes.
Ar ôl cyfnod yn y Foelas fe brynodd dŷ ar Ffordd yr Orsaf a symud y siop a'i deulu yno - sef
safle presennol y siop, lle y ffynnodd y busnes.
"Mi 'da ni'n lwcus bod geno ni gwsmeriaid da iawn," meddai Wavell. "Mae yna rai yn dod o Sir Fôn. Mae gen i regulars o ochrau Talwrn, er enghraifft, a mor bell a Rhyl.
"Doeddwn i 'rioed wedi gwneud llawer yn yr ysgol - dim rhy dda efo gwaith pensil a llyfrau - a mi fydda i'n aml yn meddwl be faswn i wedi ei wneud os na faswn i wedi prynu'r lle. Debyg mai labrwr fyddwn i wedi bod fel arall."
Er mai siop 'Wavell' ydi hi, mae'r cigydd yn dweud bod y llwyddiant wedi dibynnu ar waith caled eraill fu'n gweithio yno - yn cynnwys ei blant fu'n helpu yn y siop - ac yn enwedig ei wraig, Elizabeth, fu'n cadw'r llyfrau ar hyd yr amser.
Er y bydd yn chwith heb Wavell tu ôl i'r cownter, mae'n edrych yn debyg bod y siop am barhau gan fod person lleol yn awyddus i brynu'r busnes. Erbyn y rhifyn nesaf o'r Eco, mae'n debyg y bydd y cytundeb wedi ei gwblhau a byddwn yn medru enwi pwy fydd cigydd newydd Llanrug.
