| Pan dderbyniwyd y neges yn Wahroonga, Sydney, Awstralia, dyma'r tro cyntaf erioed i hyn gael ei wneud - a gyda hyn roedd Llanrug wedi ennill ei le yn hanes dechreuad a datblygiad y radio. Nawr, 86 mlynedd yn ddiweddarach, mae rhai o blant Bro'r Eco wedi bod yn dathlu'r digwyddiad trwy yrru negeseuon eu hunain i'r un man. Ar Medi 22, 2004, anfonwyd ebost o Ysgol Gynradd Llanrug i Ysgol Wahroonga yn eu cyfarch a chychwyn cysylltiad rhwng y ddwy ysgol. Gwnaed y cysylltiad ar ôl ymweliad Mrs Jo Harris, un o Gyfarwyddwyr Cymdeithas Hanesyddol o Wahroonga a'r ardal y mis diwethaf. Roedd hi, fel aelodau Pwyllgor yr elusen Cyfeillion Marconi, yn teimlo fod perygl i bwysigrwydd Cefn Du a Wahroonga yn hanes radio gael ei anghofio. Roedd y neges yn 1918 oddi wrth W. M. Hughes, Prif Weinidog Awstralia, yn canmol rhan milwyr y wlad yn y rhyfel. Mewn E-bost oddi wrth Bennaeth Ysgol Wahroonga i Robin Williams, Pennaeth Ysgol Gynradd Llanrug, roedd yn datgan fod gwneud y cysylltiad rhwng y ddwy ysgol yn gyffrous ac yn brofiad gwych i'r plant gyfnewid gwybodaeth am eu hunain a'u hardal. Roedd hefyd yn sôn am ymweliad rhai o blant yr ysgol a'r gerfddelw o Mercury sy'n coffau'r achlysur o drosglwyddo'r neges o Gefn Du. Mae copi o'r gerfddelw hon i'w gweld yng nghyntedd swyddfa Cyngor Sir Gwynedd yng Nghaernarfon, hyd nes ceir lle teilwng ar ei gyfer yn yr ardal.
 | 
