| Yr oedd darlith Emlyn Richards yn llwyddiant ysgubol, y Cadeirydd, Geraint Jones, Trefor, yn feistrolgar, ac yna ar y diwedd, fel yn yr amser gynt, oedodd pawb i sgwrsio'n hamddenol braf y tu allan cyn troi am adref. Apeliodd y Cadeirydd am luniau a hen lythyrau a phapurau gan bobl gan fod llawer o ddisgynyddion yn y gorffennol wedi gwneud coelcerthi o drysorau o'r fath. Talodd deyrnged i'r diweddar Huw Pritchard, gynt o Gamfa'r Bwth, a fu farw'n ddisymwth ar 8 Mai a chafwyd munud o dawelwch er cof amdano. Bu Camfa'r Bwth yn llety i nifer fawr o fyfyrwyr ar hyd y blynyddoedd ac roedd ei fam yn nodedig am ei charedigrwydd dihafal. Derbyniwyd lluniau o fyfyrwyr Coleg Clynnog ganddo i'r Ganolfan ac roedd wedi edrych ymlaen at ddod i arddangos ei gasgliad mawr o offer gofaint i'r Ganolfan a sgwrsio am ei waith fel gof yng ngefail y pentref, a hefyd yn Llanaelhaearn, lle bu gyda'i dad, Evan Pritchard, yn pedoli ceffylau gwedd y ffermydd cyfagos ac yn gwneud ac yn trwsio pob math o offer. Yr oedd yn 78 mlwydd oed. Cyhoeddwyd y ddarlith a bydd ar werth yn y siopau.
 | 
