Diolchodd i aelodau'r is-bwyllgor, i'r Ymddiriedolwyr, i bawb a gefnogodd y fenter gan nodi'n arbennig lafur y diweddar Guto Roberts ac Eirug Wyn. Diolchodd hefyd i Maredudd ap Iestyn, y pensaer, ac yn arbennig i Sharon Owen a fu'n Swyddog Prosiect am dair blynedd.

Estynnodd groeso i Reolwraig newydd y cynllun sydd eisoes wedi cychwyn ar ei gwaith, sef Siân Eirian Rees Davies, a mynegodd ei foddhad am y ffaith mai cwmni lleol Jones Brothers o'r Bontnewydd fydd yn ymgymryd a'r gwaith adeiladu.

Un a gafodd foddhad neilltuol o fod yn bresennol oedd Megan Williams o Gaernarfon, nith i Kate Roberts, oedd yn cofio eistedd ar y wal yng Nghae'r Gors pan oedd hi'n blentyn bach. Teimlai hiraeth am yr hen ddyddiau, ond ei llawenydd oedd yn ei chalon wrth weld breuddwyd a fi'n cael ei gwireddu. "Fedra i ddim diolch digon i'r Cyfeillion" meddai. "Mae'n nhw wedi ymdrechu mor ddygn."

Soniodd Norman Williams, Ymddiriedolwr a chyn Gadeirydd y Cyfeillion am werth yr etifeddiaeth a adawodd Kate Roberts nid yn unig i ni Gymry Cymraeg, ond hefyd yn rhyngwladol.

Pwysleisiodd y byddai'r Ganolfan yn rhoi sylw i holl gefndir gwaith yr awdures, gan gynnwys chwarelyddiaeth ac yn fodd o ddenu twristiaeth i'r fro, hyn oll yn ogystal â diwallu'r angen am ganolfan hwylus ar gyfer gweithgareddau'r pentref.

Sicrhawyd grantiau gan Gronfa Treftadaeth y Loteri Genedlaethol, Cronfa Wledig Gwynedd, Yr Archoll Agregau, Rhaglen Cyfleusterau a Gweithgareddau Cymunedol a Tir a Môr tuag at y prosiect a gobeithir y bydd y gwaith ar y ganolfan wedi ei gwblhau erbyn mis Hydref eleni.