Roedd y cwmni ffilmio yno i ddymuno penblwydd hapus i Mel yn 40 oed, a dyna gychwyn ar ddiwrnod cyfan o ddathlu bythgofiadwy iddo.

Aeth y bws ag ef i'r Waunfawr lle'r oedd cinio wedi ei ddarparu iddo ef a Gwen ei fam ac aelodau o'r teulu yn yr Antur.

Ar ôl cinio, i ffwrdd â'r criw am Ddinas Dinlle lle'r oedd y beicars - 'Dreigiau'r Dyffryn' yn aros amdano.

Roedd y maes awyr wedi ei droi yn faes moto beics a Mel wrth ei fodd yn cael reid ar y piliwn!

Parti mawr yn K2 Caernarfon yn dilyn hefo'r teulu, ffrindiau a chydweithwyr, a Mel yn cynorthwyo grŵp Bandana drwy chwarae'r 'dryms'.

Yn goron ar y cyfan cyflwynwyd siaced beicar ledr iddo hefo logo unigryw arni.

Bydd yna edrych ymlaen yn arw i weld Mel yn ei gôt newydd.

Gan fod pawb yn nabod Mel a Mel yn adnabod pawb bydd nifer gwylwyr S4C yn sicr o gynyddu'n sylweddol pan ddarlledir y rhaglen 'DATHLU' yn ystod mis Ebrill/Mai.

Rhaglen arbennig, penblwydd arbennig, person arbennig.

Pob hwyl i ti yn 40 Mel. Lleu