Roedd Corwen yn llawn ffermwyr ifanc o bob cwr o Gymru ddydd Sadwrn Tachwedd 17 wrth i Eisteddfod Cymru lenwi'r pafiliwn. Ynghanol y cyffro roedd Natasha Birkett yn cystadlu dros Eryri ar yr unawd offerynnol - da iawn chdi am roi Dyffryn Nantlle ar y llwyfan!
Daeth llwyddiant pellach yng Nghorwen wrth i ddwy o'r Clwb brofi bod talentau ysgrifenedig y Dyffryn yn fyw ac yn iach. Yn dilyn llwyddiant ysgubol y Clwb ar y gwaith cartref yn yr Eisteddfod Sir, braf oedd clywed fod Ela Fôn Williams wedi cael 3ydd drwy Gymru ar ysgrifennu limrig o dan 26 oed a Ffion Eluned Owen wedi cael 1af drwy Gymru am gyfansoddi cerdd o dan 26 ar y teitl 'Gwawr.' Llongyfarchiadau mawr a daliwch ymlaen gyda'r barddoni!
Roedd penwythnos cyntaf Tachwedd yn brysur iawn gyda chystadleuaeth Bowlio Deg Eryri yn digwydd yng Nglasfryn a chystadleuaeth Barnu yn Nhŷ Newydd Llandegai.
Bu teulu Ffridd, Nantlle, yn llwyddiannus iawn ar y Barnu gyda Mari yn cael 1af am farnu wyn tew a bìff o dan 18 a Gwawr yn fuddugol ar yr un cystadlaethau o dan 16. Cystadleuaeth rhwng brawd a chwaer felly oedd yr wyn tew o dan 16, wrth i Gerallt gipio'r 2il wobr! Da iawn chi a llongyfarchiadau am gynrychioli Eryri yn y Ffair Aeaf!
Ar ôl yr holl gystadlu llwyddiannus daeth hi'n amser y Parti Nadolig gyda phawb yn gwisgo'u dillad gorau ar gyfer y noson yng Nghlwb Golff Caernarfon ar Ragfyr y cyntaf. Wedi llond bol o ginio Dolig blasus, fe ddechreuodd yr hwyl wrth i bawb wisgo eu hetiau Nadolig amryliw a chanu ambell i gan ar y carioci!
Cafwyd caneuon o bob math, o 'Chwarelwr' John ac Alun gan Ioan i 'Holding out for a hero' Bonnie Tyler gan y genethod ieuengaf! Yn wir, mae talent guddiedig iawn gan ambell i aelod, swyddog a rhiant! Diolch yn fawr i Gwenno a Sara am drefnu'r noson ac i'r Clwb Golff am adael ni ddod draw - rydym ni'n edrych mlaen i ddod nol flwyddyn nesaf yn barod!
Roedd hi'n noson cystadlaethau Siarad Cyhoeddus Eryri ar Nos Fercher y 5ed o Ragfyr ac er i gar un o'r aelodau dorri lawr ar y ffordd, llwyddodd pawb yn y diwedd i gyrraedd Ysgol Nefyn yn ddiogel ar gyfer noson lwyddiannus iawn! O dan 14 roedd Llio Elenid, Glesni Bowness a Fflur Harman yn 1af am drafod llyfr Eirug Wyn 'Powdr Rhech' gyda Lilo Harman, Llinos Heledd a Iona Wyn yn 2il yn yr un gystadleuaeth. Daeth Elis Wyn, Grug Muse a Dewi Roberts yn fuddugol o dan 16 am gyflwyno araith ac o dan 21 roedd Roberta Williams, Iwan Williams, Catrin Huws Jones a Charlotte Hawksworth yn 1af am drafod a dadlau nifer o bynciau dadleuol.
Yr un oedd y gamp i'r tîm o dan 26 wrth i Sara Pierce, Gwenno Griffith, Ela Williams a Ffion Eluned ddod yn 2il! Llongyfarchiadau pellach i 9 o aelodau'r clwb, sef Fflur, Llio Elenid, Llinos, Dewi, Elis, Roberta, Catrin, Ffion a Gwenno am gael eu dewis ar gyfer timau Siarad Cyhoeddus Eryri sy'n cystadlu yn Theatr Felin Fach Ceredigion ddiwedd mis Mawrth!
Yn ystod Tachwedd a Rhagfyr oer, gwyntog a gwlyb cafwyd digon i'n diddori ar nosweithiau Llun yn neuadd yr Ysgol. Daeth Ed Holden o'r grŵp Genod Droog atom i gynnal gweithdy rap ac aeth y gwobrau am rapwyr gorau Dyffryn Nantlle i Ben ac Iolo!
Ceir remote control oedd yr hwyl un nos Lun, gyda Chris o Sbardyn yn dod draw i ddangos i ni sut mae eu defnyddio a chynnal cystadleuaeth rhwng yr aelodau! Mae'n wir dweud fod yr hogiau wedi gallu meistroli'r gamp yn llawer gwell na'r genod!
Roedd Roland a'i gŵn achub mynydd o Gymdeithas Cŵn Achub Cymru yn ymuno a ni wythnos wedyn wrth i ni gael cyfle i ddod i adnabod gwaith da'r gymdeithas a'r gwirfoddolwyr a chael dweud helo wrth rhai o'r cŵn eu hunain.
Cafwyd taith i'r Ffor un nos Lun er mwyn ymweld a Milfeddygfa Deufor.
