Profiad gwych i drigolion ardal LLEU a ddigwyddaifod yn y Babell Lên b'nawn dydd Llun, 2 Awst oedd gweld tri o'u plith yn esgyn i'r llwyfan i dderbyn gwobrau cyntaf, sef Valmai Williams, Aberdesach, laf ar y Delyneg; Ioan Gruffydd, Y Bontnewydd, laf ar y Soned, ac Alwyn Ifans, Rhostryfan, laf ar y Faled Ddigri.Roedd ymgais Valmai yn fuddugol (am yr eildro yn olynol) allan o 23 o delynegion, y tro hwn ar y testun Haint. Am y tair orau, fel hyn y dywed y beirniad, Nesta Wyn Jones yn y Cyfansoddiadau a Beirniadaethau: "... y tair wedi aros yn eu blas a'r tair wedi cychwyn ac wedi stopio yn y lle iawn" chwedl Gerallt Lloyd Owen, meistr pob arabedd, ar Dalwrn y Beirdd yn ddiweddar.
Am soned fuddugol Ioan fe ddywed Vaughan Hughes wrth ddyfarnu iddi naw marc allan o ddeg - "Mae hi'n soned gynnil, gadarn, gyfoes ei neges."
Am faled ddigri 'goch' a 'hollol amharchus' yn ôl y beirniad, yr enillodd Alwyn, 'un y b'ase Dafydd ap Gwilym mewn stitshys yn ei chlywed'. Yn anffodus, 'am resymau cyfreithiol' ni chafodd ei chynnwys yn y Cyfansoddiadau, felly cawn ni ddim darllen yr hyn a yrrodd Dewi Pws i 'werthin'.
Yn ôl y frân wen bu ond y dim i o leiaf un arall o'n beirdd ni ennill un o brif wobraullenyddol Casnewydd a'r Cylch. Roedd dilyniant o gerddi Geraint Lloyd Owen, Y Bontnewydd o fewn trwch blewyn i ennill y Goron. Allan o 28 o ymgeiswyr mewn cystadleuaeth eithriadol o uchel ei safon roedd dilyniant Geraint ymhlith y tri gorau ym marn y beirniaid ac yn 'llwyr haeddu'r Goron'.
Mewn cystadleuaeth ymylol, sef yn y Stomp a drefnwyd gan ACADEMI gwnaeth Ifan Prys o Landwrog strocan unwaith eto, gan ennill y tlws, sef stôl hardd a gyflwynwyd er cof am y diweddar Eirug Wyn, a hynny allan o lu o feirdd.
Yn y pafiliwn, cynrychiolwyd y dyffryn gan Leisiau Mignedd. Llongyfarchiadau iddynt hwy ar gael yr ail wobr, ac i Robert Wyn Roberts, Y Bontnewydd ar ddod yn 3ydd ar yr Unawd Bâs. Un arall a'i gwreiddiau'n ddwfn yn y dyffryn ac a gafodd lwyddiant neilltuol yn y Brifwyl oedd Elain Llwyd o Gaernarfon. Enillodd Elain y wobr gyntaf am Unawd o Sioe Gerdd, Ysgoloriaeth Wilbert Lloyd Roberts, 2il ar y Ddeuawd dan 21ain, 3ydd ar yr Alaw Werin 16-21 oed a chael llwyfan yng nghystadleuaeth Gwobr Richard Burton.
O'r holl enillwyr lleol, mae'n debyg mai'r rhai efo'r wên fwyaf ar eu hwynebau oedd enillwyr cystadleuaeth y Grŵp Roc, sef Anubis o Lanllyfni, a hwy, yn sicr, oedd a'r pocedi trymaf gan iddynt ennill gwobr o £1000 am eu perfformiad ardderchog ym Mhabell yr Ieuenctid.
Llongyfarchiadau i chi un ac oll.
