| Bu un o olygyddion LLEU mor ffodus â chael mynd i brofi pryd tri chwrs tra arbennig yng nghanol Ionawr eleni. Heb fynd i raffu geiriau yn null y gohebwyr mwyaf blodeuog, yn fyr, dyma'r dyfarniad ar y brecwast amser cinio a ddarparwyd gan aelodau Clwb Ffermwyr Ieuainc Dyffryn Nantlle yn Neuadd Goffa Penygroes un bore Sadwrn. Lleoliad: Hwylus, ond parcio braidd yn anodd. Ystafell: Braidd yn biws, ond sbïwch ar eich gilydd os nad ydych yn hoff o liw'r waliau. Ysmygu: Na, diolch byth. Awyrgylch: Llawn a swnllyd braf. Dim blodau ar y byrddau, ond be 'di'r ots, 'roedd na sos coch a sos brown. Gwasanaeth: Penigamp, gwên, bratia glân a gwallt twt. Bwyd: Llond bol o fwyd di-lol, blasus. Gwerth am arian: Cwbl ddiguro. Fe ffrïwyd 200 o wyau y bore hwnnw yn Neuadd Penygroes. Ond y peth gorau oll ynglŷn a'r brecwast hwn oedd fod y cyfan oll o'r bwyd wedi ei noddi neu ei roi gan garedigion a bod yr holl elw o dros £1700 yn cael ei gyflwyno i Ward Alaw, Ysbyty Gwynedd. Agorwyd y Brecwast gan Sioned, Y Fron, Llanllyfni sydd wedi derbyn triniaeth yn Ward Alaw. Hoffai'r Clwb ddiolch yn arbennig i'r holl noddwyr ac i bawb a dyrrodd yno i fwynhau'r wledd.
 | 
