Nos Wener, 21 Hydref. Arwel Jones, Hogia'r Wyddfa fydd yn cyflwyno ein gwesteion arbennig, sef John Ogwen a Maureen Rhys gyda chyflwyniad newydd sbon ar fywyd a gwaith Dr Kate Roberts. Hogia'r Bonc, o ardal chwarelyddol Bethesda, fydd yn diddanu'n gerddorol gyda'u fersiynau arbennig o rai o'n clasuron. Ymunwch â ni yng Ngwesty'r Celt, Caernarfon ar gyfer y wledd - £6 yn unig yw pris tocyn.

Bore Sadwrn, 22 Hydref. Cawn ddarlith gan Anita Myfanwy yn Llyfrgell Caernarfon am 10.30 ar y testun 'Jane Gruffydd - ei gwydnwch a'i hurddas'. Bydd cyfle i ni hefyd fwynhau rhai o ieuenctid ardal Rhosgadfan yn perfformio rhannau o weithiau Kate Roberts.

Dydd Sul, 23 Hydref. Beth am daith gerdded hamddenol ym mro Kate Roberts i ystwytho'r cyhyrau? Bydd Dewi Tomos yn ein harwain o gwmpas safleoedd y sonnir amdanynt yng ngweithiau'r awdures, ac yn cyfeirio at gyfoeth treftadol yr ardal. Cychwyn o Gae'r Gors am 1.30y.p.

I archebu tocynnau ar gyfer y digwyddiadau, cysylltwch â Sharon Owen ar 01286 882202, Gwen Lasarus ar 01286679465 neu Olwen Dafydd ar 01766 522817.