| Cafodd yr ysgoloriaeth ei sefydlu er mwyn coffau'r diweddar R. Tudur Jones, un o brif haneswyr Cristnogaeth Cymru'r ugeinfed ganrif, cyn-brifathro Coleg Bala-Bangor, athro er anrhydedd yn Ysgol Diwinyddiaeth Prifysgol Cymru, Bangor a chyn-weinidog Capel Seion, Stryd y Popty, Aberystwyth. Mae Rhys yn fab i Pedr ap Llwyd a Mari Llwyd ac yn frawd i Elain a Cynan. Graddiodd Rhys gydag anrhydedd yn y dosbarth cyntaf o Adran Gwleidyddiaeth Ryngwladol, Prifysgol Cymru Aberystwyth eleni. Mae'n weithgar gyda mudiadau Cristnogol a chenedlaetholgar ac yn golofnydd cyson i'r cylchgrawn Barn ac yn gyn-ddisgybl Ysgol Gymraeg Aberystwyth ac Ysgol Gyfun Penweddig, lle bu'n Brif Ddisgybl. Yn ôl yr Athro D.Densil Morgan, pennaeth Coleg y Celfyddydau a'r Dyniaethau ym Mangor: 'Byddai'r Athro Tudur yn falch eithriadol fod ysgolheictod Cristnogol Cymreig yn parhau, a bod myfyrwyr disglair yn dal i ddod ymlaen i wneud cyfraniad i'n byd cyfoes.' Manteisiwn ar y cyfle hwn hefyd i longyfarch ei chwaer Elain. Enillodd Elain ohoni ddwy ysgoloriaeth i fynd i astudio'r Gymraeg i Brifysgol Caerdydd eleni, y naill ar sail ei chanlyniadau lefel 'A' a'r llall o ganlyniad i gystadleuaeth agored. Pob dymuniad da iddi yn ei hastudiaethau. Llongyfarchiadau mawr i'r brawd a'r chwaer! Dy dro di nawr Cynan!
 | 
