| Ces i fy ngeni yn Flash ger Buxton, yn y Peak District. Pentref bach ydy e -yr uchaf ym Mhrydain. Ces i fy magu yng nghefn gwlad, ond dihangais i i Lundain i astudio daearyddiaeth a hanes ac i fwynhau'r goleuadau llachar! Ar ôl teithio i Dde Amerig, penderfynais i ddysgu mwy, ac es i i Glasgow i wneud gradd Meistr mewn Astudiaethau De Amerig. Wedyn es i i Fanceinion i wneud doethuriaeth mewn dinasyddiaeth a gweriniaeth yn Ariannin a Chile. Es i dramor am flwyddyn i wneud ymchwil a gwneud cyfweliadau gyda gwleidyddion a phobl o'r cymdeithasau hawliau dynol a'r grwpiau ffeministaidd. Des i i Aberystwyth yn 1996 i'r Adran Gwleidyddiaeth Rhyngwladol ble dwi'n gweithio fel darlithydd. Dechreuais i ddysgu Cymraeg ar ôl i fi gwrdd ag Arwyn, Cymro o Goginan. Ron i newydd brynu tŷ ac roedd angen adeiladwr i agor y lle tân - ond fe daniodd mwy na'r coed tân! Priodon ni dair blynedd yn ôl a nawr dyn ni'n disgwyl babi bach Cymraeg ym mis Hydref. Dwi wrth fy modd yn siarad Cymraeg â'r teulu, y cymdogion a fy nghydweithwyr er fy mod i'n gwneud llawer o gamgymeriadau. Dy'n ni wedi dechrau Clwb Cinio Cymraeg i'r dysgwyr yn unig yn ein hoedran ni yn y Coleg. Roedd hi'n anodd siarad Cymraeg ar y dechrau achos ro'n i'n teimlo mor dafodrwm a dwl ac mae hi'n cymryd amser i ddod yn hyderus. Diolch i bobl amyneddgar iawn dwi'n hapus nawr i siarad Cymraeg ac mae'r holl ymdrech wedi talu ddeg gwaith drosodd - ond dwi ddim yn barod eto i ddarlithio drwy'r iaith Gymraeg!
 | 
